Қазіргі таңда алдыңғы қатарлы өркениетті елдердің халқы коронавирус инфекциясына қарсы жаппай екпе алып жатыр. Бұл өте дұрыс шешім. Өйткені коронавирус инфекциясынан сақтанудың бірден-бір сенімді әрі тиімді жолы – вакцинация. Сондықтан дені сау және қарсы көрсетілімдері жоқ 18 бен 65 жас аралығындағы азаматтардың коронавирус инфекциясына қарсы екпе алғаны абзал.
Дүниежүзілік денсаулық сақтау ұйымы 2020 жылдың 30 қаңтарында SARS-CoV-2 коронавирусының өршуін халықаралық денсаулық сақтау саласындағы төтенше жағдай деп танығаннан кейін COVID-19 вакциналарын төтенше жағдайда тіркеуді бастады.
Нәтижесінде 2021 жылдың басында әлемде 200-ге жуық коронавирусқа қарсы вакцина жасалды. 63 препарат бойынша адамдарға сынақтар жасалды. Ал олардың алтауы әртүрлі елдерде халықты вакцинациялау үшін қолданылады. Дегенмен клиникалық зерттеулердің үшінші кезеңі әлі аяқталған жоқ. Салыстыру үшін қалыпты жағдайда жаңа вакцинаны жасау, тіркеу және қолдануға рұқсат беру 10 жылға дейін созылады.
2021 жылдың 2 тоқсанынан бастап қазiргi уақытта клиникалық сынақтардың III кезеңiнде тұрған отандық өндiрiс QazCovid-in препаратымен вакцинациялауды бастау жоспарланып отыр.
QazCovid-in вакцинасы вакциналарды дайындаудың сенімді және уақытпен сыналған технологиясы негізінде әзірленді. Бұл вакцинаның барлық компоненті егжей-тегжейлі зерттелген және қауіпсіз.
Қазіргі уақытта биологиялық қауіпсіздік проблемалары ҒЗИ ғалымдары әзірлеген белсенділігі жойылған QazCovid-in COVID-19-ға қарсы клиникалық зерттеулердің ІІІ кезеңінен өтіп жатыр.
