Мемлекет басшысының тапсырмасына сәйкес Жамбыл облысында «Жайлы мектеп» Ұлттық жобасы аясында төртінші білім беру нысаны пайдалануға берілді. Өңір басшысы Ербол Қарашөкеев Тараз қаласы «Ұлы дала» (15) шағынауданындағы №69 жаңа мектептің ашылу салтанатына қатысты.
Ербол Қарашөкеев оқушылар, педагогтер мен ата-аналар алдында құттықтау сөз сөйледі.
— «Жайлы мектеп» Ұлттық жобасы Мемлекет басшысы Қасым-Жомарт Кемелұлы Тоқаевтың тікелей тапсырмасы бойынша еліміздің барлық өңірлерінде жүзеге асырылуда.Өткен жылы облыста 3 жайлы мектеп салынды. Биыл Тараз қаласы Шөлдала алқабында 1 және Қордай ауданында 2 жайлы мектеп ашылады деп күтілуде.Білім беру инфрақұрылымының сапасын арттыру негізгі бағыттардың бірі болып қала береді, – деді облыс әкімі.
Жаңа үлгідегі мектепте 97 кабинет, 3 шеберхана, 6 зертхана, 4 компьютерлік сынып, хореографиялық залдар, коворкинг-орталықтар, үлкен асхана және 4 спортзалы қарастырылған. Сыныптарда интерактивті тақталар орнатылған. Білім ұясында 1310 оқушы оқиды.
2000 балаға арналған мектеп оқушылардың IT-құзыреттерін, ғылыми және шығармашылық әлеуетін қолдау үшін заманауи робототехника кабинеттерімен және STEM-зертханалармен жабдықталған, сонымен бірге бейнебақылау жүйелерімен қамтамасыз етілген.
Оқу ордасында инклюзивті білім беруге жіті көңіл бөлініп отыр. Ерекше қажеттіліктері бар балалар үшін пандустар, лифттер, санитарлық тораптар және инклюзивті білім беру кабинеті қарастырылған.
— Менің 3 балам жайлы мектептің табалдырығын аттап отыр. Олардың заманауи жабдықталған, кең әрі жайлы ортада оқитынына өте қуаныштымын. Жаңа білім ұясында ұл-қыздарым жан-жақты дамып, жемісті жетістіктерге қол жеткізеді деп сенемін, – дейді 7 баланың анасы Майра Асылова.
Биыл облыста 26 білім беру нысанының құрылысы жоспарланған, оның 21-і (11 мектеп және 10 қосымша ғимарат) жыл соңына дейін пайдалануға беріледі деп күтілуде.
2026 жылы тағы 6 білім беру нысанының (4 мектеп және 2 қосымша ғимарат) құрылысы бастау алады.
