Елбасымыз Нұрсұлтан Назарбаевтың «Қазақстанның болашағы- қазақ тілінде» деген ұранды сөзінің мәнін терең ұғынған, тіліміз тәуелсіздіктің айнымас темірқазығы екендігін жадына тоқыған Мұхтар Әуезов атындағы орта мектеп ұжымы 5 қыркүйек- «Қазақстан халқы тілдері күні» мерекесіне орай бірқатар танымдық іс-шаралар өткізді. «Ахмет Байтұрсынұлы және мәңгілік ел — мәңгілік тіл» атты онкүндік іс-шара барысында ашық тәрбие сағаттары өткізіліп, мектеп кітапханасында бұрыштар ұйымдастырылып, оқушылар тіл төңірегінде шығарма, эсселер жазды.
«Ахмет Байтұрсынұлы — қазақ тілі білімінің атасы», «Латын әліпбиінің негізін қалаушы», «Тілге құрмет — елге құрмет», «Тілім — менің тірегім» атты тақырыптарында өткен ашық тәрбие сағаттарында оқушылар ұлттың жандануына да яки жоғалып кетуіне де тілдің әсері зор екендігін, көсегемізді көгертер ана тілімізді дүбара күйге түсірмей, шұбарламау қажеттігін ұғынды. Аталған танымдық тәрбие сағаттарына мектеп директорының тәрбие ісі жөніндегі орын- басары Гүлжан Құралбаева арнайы қатысып, талдау жасады. 3-4 сынып оқушылары «Тілім — өлшеусіз қазынам» тақырыбында, 8-10 сынып оқушылары «Ахмет Байтұрсынұлы және Мәңгілік ел мұраты» атты тақырыпта шығарма жазу барысында қазақ тілінің таза қалпын құрастырып, «Тіл құралын» қалдырып кеткен Ахаңның «Мәңгілік ел» мұратының негізі — ана тілі екендігін сезінді.
Халықты ағарту ісі жас ұрпақтан, білім ошағынан басталатынын білген Ахаң әліппе құрастыру кезінде де асқан қырағылық танытқан. Соның дәлелі болса керек, араға үзіліс салып «Әліппемен» қайта қауыштық. Бұл-білім саласындағы тарихи сәт. Әрі оқу жылының бастауы тіл жанашыры Ахаңның туған күні құрметіне орай белгіленген тілдер мерекесі күнімен ашылуы да тегін емес. Алдағы уақыттарда тәу етер Тәуелсіздігімізбен тұспа-тұс келіп отырған атаулы даталарымызды да лайықты өткіземіз деп сенемін.
Ермахан ДАУЛЕТӘЛІ,
Мұхтар Әуезов атындағы орта мектептің педагог ұйымдастырушысы.
