Бұл туралы Өңірлік коммуникациялар қызметі алаңында өткен брифинг барысында Жамбыл облысы әкімдігінің цифрландыру және архивтер басқармасының басшысы Шалхар Амантуров мәлімдеді.
– «Қолжетімді интернет» Ұлттық жобасы шеңберінде Жамбыл облысында Шақпақата — Отар автокөлік жолы бойында (449,8 км) 7 антенна-діңгек құрылысын және Мойынқұм ауданындағы «Хантау — Ақсүйек, Бурылбайтал -Қашқантеңіз» республикалық автомобиль жолының бойында 4 АДҚ салу жоспарланған. Қазіргі таңда, аталған жоба бойынша жобалық-сметалық құжаттаманың экспертизалары алынып, құрылыс-монтажтау жұмыстарын жыл соңына дейін бастау жоспарлануда, – дейді Шалхар Болатұлы.
Сондай-ақ, басқарма басшысының айтуынша, 2026 жылдың жарты жылдығында мобильді операторлар тарапынан 76 жаңа базалық станция салынып, 102 базалық станцияда модернизациялау жұмыстары жүргізілген.
Айта кетейік, бүгінгі таңда Жамбыл облысында 353 елді мекеннің 40-нда (11,3%) – 2G, 48-і (13,6%) – 3G, ал 265 елді мекен (75,1%) – 4G мобильді интернетімен қамтамасыз етілген.
