Мемлекет басшысы Қасым-Жомарт Тоқаевтың «Қазақстандағы сайлау туралы» конституциялық заңға өзгерістер енгізуіне байланысты елімізде ауыл әкімдерінің сайлауын өткізудің жаңа жүйесі қалыптасып отырғаны белгілі. Аталған Заңға сүйенсек, ауыл әкіміне кандидат ретінде азаматтардың өзін-өзі немесе саями партиялардың өз үміткерін ұсынуына мүмкіндігі бар. Егер сайлауға түскен үміткерлер 2 адамнан аспаса, аудан әкімі де ауыл әкіміне кандидат ретінде бір үміткер ұсына алады. «Шіркін, осы ауылға әкім болып, туған ауылымды гүлдендірсем» деген арман жетегінде жүрген азаматтар заң бойынша 25-жасқа толған болуы керек. Сонымен қатар, біліктілігі, жоғары білімінің болуы, кірістер департаментіне әйелі мен өзі туралы декларация өткізуге міндетті болуы, жалпы мемлекеттік қызметшілерге қойылатын талаптарға сай болуы да аталған заңда нақты көрсетілген. Осындай талаптар үдесінен шыға білген үміткерлер қазір 2016 жылы сайланған ауылдық округ әкімінің орнына, яғни өкілетілік мерзі өткен немесе тоқтатылған әкімдердің орнына отыруға талпынып жатыр. Біздің айтпағымыз – елдегі жетекші партияның аудандық филиалдарының ауылдық округ әкімдігіне үміткер ұсыну барысын оқырманға жеткізу.
Мәселен Байзақ ауданындағы Әбу-Насыр әл-Фараби атындағы мәдениет үйінде өткен «Nur Otan» партиясы аудандық филиалының кезектен тыс XXХІI конференциясын мысал ретінде алсақ, аталған жиын мемлекеттік Гимнмен ашылып, оны жүргізу төралқа мүшелеріне жүктеліп, жұмысшы органдар сайланды. Конференцияны ашып жүргізген аудандық партия филиалы төрағасының бірінші орынбасары Шолпан Байтақова жұртшылыққа күн тәртібіндегі мәселелерді таныстырды. Аудан әкімі Бақыт Қазанбасов, «Nur Otan» партиясы Жамбыл облыстық филиалы төрағасының орынбасары Мәди Мәтен, аудандық партия филиалы Саяси кеңесі мен Саяси кеңесі Бюросының мүшелері, аудандық мәслихаттың хатшысы және «Nur Otan» партиясының аудандық мәслихатындағы депутаттық фракциясының мүшелері, саяси партиялар мен үкіметтік емес ұйымдардың өкілдері, мекемелер мен ауылдық округ әкімдері, жергілікті кәсіпкерлер мен шаруа қожалық басшылары, этномәдени орталықтардың жетекшілері, партия аудандық филиалы «Jas Otan» Жастар Қанатының мүшелері мен жергілікті бұқаралық ақпарат құралдарының өкілдері қатысқан басқосуда мандаттық комиссияның конференция делегаттарының өкілеттіктері туралы хабарламасы тыңдалды.
Бұдан кейін «Nur Otan» партиясы Байзақ аудандық филиалының төрағасын сайлау бойынша ұсыныс түсіп, партияның облыстық филиалы төрағасының орынбасары Мәди Мәтен «Nur Otan» партиясы Байзақ аудандық филиалының төрағалығына аудан әкімі Бақыт Алпысбайұлы Қазанбасовтың кандидатурасын ұсынды. Конференция делегаттары кандидатураны қолдап, ашық түрде бірауыздан дауыс берді.
Келесі кезекте күн тәртібіне қойылған негізгі мәселенің бірі «Nur Otan» партиясы қоғамдық бірлестігінен Байзақ ауданы, Сарыкемер, Ынтымақ ауылдық округтерінің әкімдеріне кандидат ұсыну жайы қаралды. Осылайша аталған парияның аудандық филиалы тарапынан Сарыкемер ауылдық округі бойынша партия мүшесі, Сарыкемер ауылдық округінің әкімі Сәуле Тлеуқұлова мен Ынтымақ ауылдық округі бойынша партия мүшесі, Ынтымақ ауылдық округінің әкімі Мейірбек Ноғаевтың кандидатурасы енгізілді. Нәтижесінде, делегаттардың ашық дауысқа салуы арқасында кандидаттар аудандық партия филиалы атынан сайлауға түсетін болып шешілді.
