Жемшөп қоры жеткілікті дайындалуда

0 7

Т.Рысқұлов ауданында былтыр жол картасы бағдарламасы аясында 32,5 миллион теңгеге 2 жер каналына (Сарыбұлақ пен Жарлысу каналдары) механикалық тазарту жұмыстары жүргізіліп 222 гектар алқап қайта айналымға қосылыпты. Биыл да бұл жұмыстар өз жалғасын тауып, тағы 2 канал (Мамай-Қайыңды мен Талды-Су каналдары) 52,0 миллион теңгеге механикалық тазалаудан өтсе, 203 гектар қайта айналымға қосылатын көрінеді.

Бүгінде ауыл шаруашылығы саласында мал азығын молынан дайындау да маңызды мәселеге айналып отыр. Аудан бойынша ауылдық округтердегі мал басының санына қарай ағымдағы жылы дайындалуға тиіс мал азығы бойынша индикаторлық тапсырма аудан әкімдігі арқылы беріліпті. Осыдан кейін, яғни ауданда 2021 жылғы мал азығын дайындау жұмысы мамыр айының 27-нен басталса керек. Осылайша 32 143 гектар шабындық алқаптан шөп шабу жедел қолға алынған.

– 32143 гектар шабындықтағы мал азығы дақылдарынан 12550 гектары жоңышқалық (оның 3500 гектары биылғы егілгені), 1151 гектары житняк, 600 гектары экспарцет, 17842 гектары табиғи шөп.

Бүгінгі күнге аудан бойынша 12550 гектар алқаптың барлығына шалғы түсіп, жоңышқалықтың І-ші орымының әр гектарынан орташа есеппен гектарына 38,5-40 центнер өнім алынды. 310 гектар житняктың әр гектарынан 27 центнер, 425 гектар экспарцеттен 30, 9900 гектар табиғи шөптің әр гектарынан 20 центнер, барлығы 198 000 тонна өнім жиналып, биылғы жылға дайындалуға тиісті 275 000 тонна тапсырма 72 пайызы орындалды.

Ауданда жылда шөп дайындауда берілген тапсырмалар асыра орындалып келді. Мысалы, 2019 жылы дайындалған шөп 204955 тонна (118 пайыз), 2020 жылы 205780 тонна (108,3 пайыз). Бүгінгі күнге ауыл округтерінен  жинақталған мәліметтің негізінде  57500 тоннаға жуық бұрынғы жылдардан қалған шөп мал азығына жарамды ретінде тіркеліп отыр.

Ауданда соңғы күндері жауған жауыннан, сонымен қатар, аудандағы 16 дана жаңбырлатып суару қондырғыларын тиімді пайдалану барысында шабылатын алқаптардан жиналатын шөп, егін орағы науқанынан дайындалатын 20 000 тонна сабан, төменгі қыстаудағы құмнан дайындалатын шөптер, бұрынғы жылдардан қалған шөптер, 2021-2022 жылғы мал қыстату науқанында қажетті мал азығын дайындауға мүмкіндік беріп отыр, – дейді аудандық ауыл шаруашылығы бөлімі басшысының міндетін атқарушы Ә.Туғанбаев.

Аталған ауданда бүгінде 16 бригада шөп дайындау ісімен айналысып жатыр. Науқандық жұмысқа ұрамында 12 дана «Герман» шөп шалғысы, 8 дана шөп орағы, 19 дана шөп тайлағыш, 11 дана Кунь-10, 12 дана трактор тіркемесі мен 21 дана автокөлік жұмылдырылыпты.

Leave A Reply

Your email address will not be published.