Бүгін ұлыстың ұлы күні 22 Наурыз күні мерекесіне орай Құлан ауылы Сұлутөр кинотеатрында караоке клубының ашылу салтанаты өтті. Атаулы шараға аудан әкімі Е.Садырқұлов пен аудандық ардагерлер кеңесінің төрағасы Қ.Бижанов арнайы қатысып, ашылу лентасын қиды.
Жалындаған жастардың басын жиі қосатын мұндай орталықты ашудағы басты мақсат – бос уақытты тиімді пайдалану, ұлттық музыкалық мұрамызды насихаттау және жастардың бойына өнерге деген сүйіспеншілікті дарыту, музыкаға деген қызығушылықтарын арттыру, жүйелі сөйлеуге дағдыландыру. Достыққа, ұйымшылдыққа тәрбиелеу.
Жиында сөз алған аудан басшысы:
– Ауданымызда алғашқы рет караоке залы ашылып отыр. Алдағы уақытта өңір жастарының сүйікті жеріне айналарына сенім артамын деп, ізгі тілегін жеткізді.
Караокеде алғашқы болып С.Мұқановтың сөзіне жазылған «Қазақ вальсі» әнін Оразалы Аружан орындады.
Бұл орын жастарға тегін және кез-келген уақытта қол жетімді болады. Әрбір қызығушылық білдірген жас, осы жерге келіп өз өнерін шыңдауға мүмкіндігі бар.
Жиын соңында Аудандық ардагерлер кеңесінің төрағасы Қожайхан Бижанов жастарға ақ батасын берді.
Сонымен қатар, аудандық білім бөлімінің ұйымдастыруымен мектеп оқушылары арасында «Әз – Наурыз» тақырыбында эссе жазу мен сурет салудан жарыс өтті.
