Арубаев соғыс ардагеріне ерекше кеш ұйымдастырды

Ел азаматтары сонау қасіретті жылдары тұтанған алаудың сөнгеніне 76 жыл өтсе де, әлі күнге дейін қыршыннан қиылған боздақтарын есінен бір сәтке де шығарған жоқ. Отбасын отағасынан, анасын баласынан ажыратқан қысылтаяң кез сыр сандықта ақтық дем қалғанша сақталары шүбәсіз.
Күні кеше перзентін құшағына басып, маңдайын иіскеген оғландарымыз қас-қағым сәтте дархан даланың шайқас алаңынан бір-ақ шықты. Ұлтының болашағы үшін жанын садаға етіп, қасық қаны қалғанша күресті олар. Жүрекке жебесін, санаға салмағын артқан аласапыран жылдардың шоғы әлі де маңайына жан жуытпайды. Ал жыл өткен сайын ерлерге деген құрмет арта түскенімен, олардың да қарасы арамыздан жәймен сөніп барады. Мына біз, кейінгі ұрпақтың өкінетініде осы.

Бүгінде ауданымызда Тәуелсіздіктің 30 жылдығының куәгері болған Ұлы Отан соғысының ардагері Қасен ата Шанбаев қана қалып отқаны көңілге қаяу ұялатады екен. Жасы тоқсанның тоғызына аяқ басқан ердің есінде бәрі бар. Ал аудан жұртшылығының отқа кеудесін тосқан ардагерге деген ықыласы тым бөлек

Біз бұған Ұлы Отан соғысының аяқталғанына 76 жыл толуына орай ардагерді арнайы құттықтай барған аудан әкімі Сәкен Арубаевтың сый-құрметінен анық аңғардық.

Бұл жолғы құттықтаудың өзгешелігі — ардагердің үйіне аудан өнерпаздары сонау зұлматты жылдарды еске түсіретін әуендерді кемеліне келтіре шырқап, қарияның көңілін көтертті. Аудан басшысы ардагерді осы кешті арнайы ұйымдастырылғанын айтып, сый-сияпатын ұсынып, миллион теңге көлемінде қаражатпен қолдау көрсетті.

– Қай халықтың болмасын ұлттық болмысында үлкенді сыйлап, құрмет көрсету ғұрпы бар. Сол бір тамаша дәстүр күні бүгінге дейін жалғасын тауып келеді. Ел мүддесін бәрінен биік қойып, ұрпақ санасына тәлім сіңірген, жетеліге аталы сөз айтқан қарияларымыз бен оққа кеудесін тосқан оғландарымыздың ізі мен сипатты әңгімесі ешқашан көнермейді ата. Сіздер көзіміз көрген еліміздің қаһарманысыздар. Жеңістің алғашқы дәмін сезінген де, кейінгі ұрпаққа «қой үстіне бозторғай ұя салған» ғұмырды тарту еткен де, бүгінде шаттанып жүргеніміз де сіздердің арқаларыңызда. Ел ертеңі үшін ажалмен бетпе-бет келсеңіздерде, мойымадыңыздар. Ерліктің ерен үлгісін көрсете білдіңіздер. Біз, яғни, өскелең ұрпақ сіздердің аман-саулықтарыңызды Алла Тағаладан тілейміз. Бүгін жеңістің тәтті дәмін сездіретін әсем әуендер сіздің құрмеиіңізге, – деген Сәкен Қаланұлы ардагермен өткен-кеткенге ой жүгіртті.

Өз кезегінде сөз алған ардагер аудан басшысына шексіз ризашылығын білдіріп, өнерпаздармен бірге ән шырқады. Ақ батасын беріп, алғысын білдірді.
Бүгінде ардагердің 3 қызы мен 3 ұлының қатары 18 немереге, 37 шөбереге, 4 шөпшекке жетіп отыр. Ал қарияның денсаулығына қызы Қалия мен шөбересі Гүлбаршын қарайласып отыр.

Ардагермен кездесуге аудандық мәслихат хатшысы Райымбек Сейітов, аудан әкімінің орынбасары Олжас Баққараев, Айшабибі ауылдық округінің әкімі Дәрмен Дәулет пен аудан әкімдігі ішкі саясат бөлімінің басшысы Мадияр Сәмбетов қатысып отырды.

Ақжігіт Жетпісбай,
Жамбыл ауданы әкімінің баспасөз хатшысы