Аудан әкімі Ерлан Қыдыралыұлы аудан аумағындағы бірқатар құрылыс нысандарын аралап, атқарылып жатқан жұмыстардың сапасы мен орындалу барысын бақылап шықты. Іссапар барысында әлеуметтік және инфрақұрылымдық маңызы бар жобалардың жүзеге асырылуына ерекше назар аударылды.
Алдымен аудан басшысы Тоғызтарау ауылындағы Т.Тоқтаров атындағы орта мектепке жапсарлас салынып жатқан қосымша ғимараттың құрылысымен танысты. Қазіргі таңда нысанда құрылыс жұмыстары қарқынды жүргізілуде. Жоба аясында оқушыларға арналған спорт залы, асхана және төрт оқу кабинеті салынуда. Сонымен қатар, ауылдағы Т. Рысқұлов көшесіндегі орташа жол жөндеу жұмыстарының барысын көріп, атқарылып жатқан жұмыстардың сапасына назар аударды.
Іссапар барысында Тастөбе ауылындағы спорт кешенінің құрылысы мен шағын футбол алаңына жүргізіліп жатқан ағымды жөндеу жұмыстары да қаралды. «Ауыл – Ел бесігі» бағдарламасы аясында жүзеге асырылып жатқан бұл жобаға 514,7 миллион теңге қаржы бөлінген. Сондай-ақ Қостөбе ауылындағы орта мектеп құрылысының барысы да аудан әкімінің назарынан тыс қалмады.
Шәкен Ниязбеков ауылында Ту тұғыры, балалар ойын алаңы және Б.Досымбекұлы көшесіне жүргізіліп жатқан ағымды жөндеу жұмыстары таныстырылды. Сонымен бірге, «Ауыл – Ел бесігі» бағдарламасы аясында салынып жатқан мәдениет үйінің құрылысы қаралды. Жауаптылардың айтуынша, нысан құрылысы 2026 жылы аяқталады деп жоспарлануда.
Нысандарды аралау барысында аудан әкімі жауапты мердігер мекемелер мен сала мамандарына барлық жұмыстарды сапалы әрі белгіленген мерзімде аяқтауды тапсырды.
Жамбыл ауданы
