Республикалық референдумға санаулы күндер қалды.
Бұл – жай ғана дауыс беру емес.
Бұл – ел тағдырына, болашақ ұрпақтың бағытына тікелей әсер ететін шешім.
Біз жаңа Конституцияны қабылдау арқылы қандай мемлекетте өмір сүргіміз келетінін айқындаймыз. Әділет үстемдік еткен, заң бәріне ортақ, азаматтың құқығы қорғалған ел құру – баршамыздың ортақ мұратымыз.
Кіріспе «Біз, біртұтас Қазақстан халқы…» деп басталады. Бұл сөздер – үлкен жауапкершілік. Өйткені биліктің қайнар көзі – халық. Демек, Конституцияның шынайы авторы да – өзіміз.
Жаңа жоба – тарихи сабақтастықтың жалғасы. Байырғы қазақ жеріндегі мемлекеттілікті нығайту, Ұлы Даланың мыңжылдық мұрасын сақтау – бұл өткенге құрмет қана емес, болашаққа бағытталған сенім.
Бүгінгі геосаяси ахуал күрделі. Осындай кезеңде мемлекеттің унитарлық сипатын, аумақтық тұтастығын, шекарасының мызғымастығын бекіту – ел қауіпсіздігінің берік қалқаны.
Жаңа Ата заңның өзегінде – адам. Оның қадір-қасиеті, құқығы мен бостандығы. Әділетті Қазақстан мен «Заң мен Тәртіп» қағидаты – құр ұран емес, нақты іс пен жауапкершіліктің өлшемі болуы тиіс.
Бірлік, ынтымақ, этносаралық келісім – біздің басты байлығымыз. Біз бейбітшілікті таңдаймыз. Біз тұрақтылықты таңдаймыз. Біз болашақ алдындағы тарихи жауапкершілікті сезіне отырып, саналы таңдау жасаймыз.
15 наурыз – ел тағдырына бейжай қарамайтын әр азаматтың күні.
Бұл – бірліктің күні.
Бұл – жауапкершіліктің күні.
Бұл – болашақты бірге айқындайтын күн.
Біз, біртұтас Қазақстан халқы, ортақ ерік-жігермен жаңа Конституцияны қабылдаймыз!
