Бүгін «AMANAT» партиясы Жамбыл облыстық филиалы жанындағы Сыбайлас жемқорлыққа қарсы іс-қимыл жөніндегі кеңес пен Партиялық бақылау комиссиясының мүшелері Жамбыл ауданына қарасты Қостөбе ауылында салынып жатқан 100 орындық мектеп құрылысына зерделеу жұмыстарын жүргізді.
Айта кету керек, қазіргі таңда Қостөбе ауылында тек бастауыш мектеп қана бар. Ал, жоғары сынып оқушылары көрші Жамбыл ауылына қатынап оқуға мәжбүр. Осыған байланысты ауылға орта мектеп салу мәселесі туындап, ол «AMANAT» партиясының Сайлауалды бағдарламасына енгізілген. Соның нәтижесінде өткен жылы ауылда 100 орындық мектептің құрылысы басталған болатын.
Білім нысанының құрылысына жауапты мердігер мекеме – «ҚазМұнайҚұрылыс» жауапкершілігі шектеулі серіктестігі. Қазіргі таңда құрылыс жұмыстарының 45 пайызы аяқталған. Бүгінде нысанда шатыр жабу, сыртқы қаптау, есік-терезелерді орнату және электр желілерін монтаждау жұмыстары жүргізілуде. Комиссия мүшелері мектептің бірінші блогының шатырын ағымдағы жылдың 5 ақпанына дейін, ал электр желілерін монтаждау жұмыстарын 10 ақпанға дейін аяқтау жөнінде ұсыныстарын білдірді. Айта кетейік, мектеп ғимараты осы жылдың 10 маусымына дейін толық аяқталып, пайдалануға беріледі деп жоспарлануда. Құрылыс барысы аталған мерзімге дейін партияның тұрақты бақылауында болады.