Жамбылдық мемлекеттік қызметші ҚР Парламенті Сенатының жанындағы Талдау мектебіне жолдама алды
Жамбыл облысы әкімі аппаратының өңірлік даму және ұйымдастыру-инспекторлық жұмыс бөлімінің бас инспекторы Ұлан Сейсенұлы Айхожаев ҚР Парламенті Сенатының жанындағы Талдау мектебіне жолдама алды.
Ұлан Сейсенұлы 1994 жылы дүниеге келген. Білімі жоғары. Л.Н. Гумилев атындағы Еуразия ұлттық университетінде, Ұлттық зерттеу университеті Экономика жоғары мектебінде (РФ, Санкт-Петербург қаласы) білім алған. Экономика және бизнес магистрі. Өңірлік кадр резервінің мүшесі.
Еңбек жолын 2019 жылы жеке секторда бастаған.
Әр жылдары «SUN Inc.» ЖШС-ның басқарушы директоры, «Айкүміс» шаруа қожалығының қаржы директоры, «Алашорда» мектебінің директоры, «Ғарыш» дизайнерлік студиясының бренд-менеджері қызметтерін атқарған.
2025 жылдың маусым айынан бастап Жамбыл облысы әкімі аппаратының Өңірлік бақылау және ұйымдастыру-инспекторлық жұмысы бөлімінің бас инспекторы қызметіне кірісті.
Ол урбанистика, болашақтың қаласы және өңірлік даму бағыты бойынша қазақстандық және шетелдік танымал лекторлар мен тренерлерден, мемлекет қайраткерлері, сарапшылар мен аналитиктерден дәріс алады.
Айта кетейік, аталған жобаға қатысу үшін 1000-нан астам өтінім түсіп, олардың ішінен 71 үміткер таңдап алынған.
Талдау мектебінің негізгі мақсаты – мемлекеттік басқаруда, әлеуметтік және гуманитарлық зерттеулерде, БАҚ-та аналитикалық тәсілдерді күшейту.
2022-2025 жылдары мектептің төрт легі өткізіліп, мемлекеттік қызмет, академиялық және аналитикалық ұйымдар, БАҚ, ұлттық компаниялар мен азаматтық сектордан шамамен 300 аналитик білімін жетілдірді.
