Сыбайлас жемқорлыққа қарсы қызмет агенттігінің қызметкерлері Қызылорда облысында тексеріс жүргізіп, бірқатар заңсыздықтарды алдын алды, деп хабарлайды kaz.orda.kz.
Шиелі аудандық білім бөлімінің басшылығы 1 литр сүтті 14,5 млн теңгеге сатып алмақшы болған. Тексерістен кейін сүттің бағасы бірден 223 теңгеге дейін түскен.
Сондай-ақ, Қармақшы аудандарының біріндегі мектеп балаларға 1 млн-ға куртка алмақшы болғаны анықталды.
«Қармақшы ауданының № 275 орта мектебі балаларға 125 қысқы куртка сатып алмақшы болған. Әр куртканы 1 670 143 теңгеге бағаланғаны белгілі болды. Сөйтіп, білім ошағы бұл мақсатқа 208 миллион теңгежұмсамақшы болған. Біздің ұсынысымызға сәйкес тауар құны 16 701 теңгеге дейін төмендетілді. Ал жалпы сатып алу сомасы 2 миллион теңге болды. Осылайша, 206 680 197 теңге мемлекеттік қаражат қайтарылды» деді Сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының бірінші орынбасары Ғалия Әлімқұлова.
2022 жылдың екі айының қорытындысы бойынша 17 мекемеге жіберілген ұсыныстардың нәтижесінде 351 230 304 теңгені құрайтын бюджет қаражаты үнемделген.
