Шымкент қаласының білім саласында сыбайлас жемқорлықты болдырмау, қағазбастылықтан арылу мақсатында 32 мемлекеттік көрсетілетін қызмет түрі 100 пайыз автоматтандырылған.
Қалалық білім басқармасы басшысы Жанат Тәжиеваның айтуынша, білім беру ошақтары толығымен сенім байланыс орталықтарымен және «OPEN ЅРАСЕ» кабинеттерімен қамтамасыз етілді. Мектеп директорларының кабинеттері сыныптарға беріліп, кабинеттері бірінші қабатқа көшірілді. Нәтижесінде арыз-шағым 75 пайызға, қағазбастылық 100 пайызға төмендеген.
Одан бөлек, бюджеттің ашықтығын қалыптастыру мақсатында «Ашық бухгалтерия» жүйесіне көшу үшін пилоттық жоба ретінде басқармаға қарасты 7 мекемеде (3 мектеп, 4 балабақша) жұмыстар басталды. Аталған нақты қалдықтарды талдау арқылы шығындарды тиімді жоспарлауға, бюджет қаражатын тиімді бөлуге, ішкі бақылау жүйесінің тиімділігін арттыруға, шоғырландырылған есептіліктен бастапқы құжатқа дейін ашық есеп жүргізуге мүмкіндік береді. Шаһар басшысы пилоттық жобаны барлық білім беру ұйымдарында қолға алуды тапсырды.
