Мемлекет басшысы Қ.К.Тоқаев алтыншы шақырылымдағы Парламенттің 6-сессиясына қатысып, Қазақстан халқына арнаған кезекті Жолдауын жариялады.
Саяси құжатта Президентіміз жаһандық пандемия жағдайында алдыңғы сапта тынымсыз еңбек еткен мамандарға алғыс айтты. Сондай-ақ, басты міндеттің әлеуметтік-экономикалық тұрақтылықты сақтауға бағытталатынын атап өтті.
Мемлекет басшысы Жолдауда «Ұлт жоспары – бес институционалдық реформаны» негізгі бағдар етіп, ұстануымыз қажеттігіне айрықша тоқталды.
«Бүгінде мемлекеттік органдар мақсаттарды жүзеге асыру үшін тиісті жұмыстар жүргізуде. Мен халыққа берілген уәделерді міндетті түрде орындаймын. Біздің жұмысымызда Елбасы әзірлеген бес институционалдық реформа мен Ұлт жоспарын толық іске асыру қажеттілігін негізге алған жөн», — деп өз ойын жеткізген Президент мемлекетіміз бен халқымыздың мүдделерін ескере отырып, бастаманың біртіндеп жүзеге асырылатынын атап көрсетті.
Жолдаудың қай тармағын алып қарасақ та, мемлекетімізде жүйелі саясаттың болуы жөніндегі мақсат-міндеттер маңызды орын алған. Жүйесіз жұмыстардың ішкі саяси жағдайдың тұрақсыздануына және тіпті мемлекеттің жоғалуына әкелетінін айта кетті. Сондықтан, біз саяси реформалардың жүзеге асырылуына атсалысуымыз керек.
Қоғамда көптен бері талқыланып келе жатқан жерге байланысты жеріміздің шетелдіктерге сатылмайтынын мәлімдеп, ел Үкіметіне ауыл шаруашылығы жерлерін толыққанды экономикалық айналымға енгізудің өзге әдіс-тәсілдерін әзірлеу бойынша нақты тапсырма берді.
Сонымен қатар, өндірісті арттыру, күрделі әрі технологиялық экономикаға иек арту, адам капиталын дамытып, инвестиция мен білімнің саласын қалыптастыру, экономиканы жасылдандырып, қоршаған ортаны қорғау, мемлекеттің негізделген шешімдер қабылдап, қоғам алдында сол үшін жауап беруін қамтамасыз ету сынды мәселелер негізі басымдықтар қатарына кірді.
Ендеше, ел тұрғындары Мемлекет басшысы нақтылап берген бағытты нық ұстап, экономикамызды жақсарту жолында жұмылған жұдырықтай жұмыс істеуіміз қажет. Әсіресе, жеті экономикалық негізге сүйеніп, сенімді әрекет еткеніміз абзал.
Гүлнұр Оралбаева,
аудандық мәслихаттың депутаты
