Қоршаған ортаны қорғау – әрбіріміздің парызымыз

0 150

Бүгінгі күнде «Жамбыл облысы әкім­дігінің Табиғи ресурстар және табиғатты пайдалануды рет­теу басқармасының Ақыртөбе орман­дарды және жануарлар дүниесін қор­ғау жөніндегі мекемесі» КММ-нің қарамағында 17 038 га орман қоры жері бар. Оның ішінде – 5 537 гектары орманды алқаптар. Осыған қоса «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасының 2001 жылғы 23 қаңтардағы Заңына және «Ерекше қорғалатын табиғи аумақтар туралы» Қазақстан Республикасының 2006 жылғы 7 шілдедегі Заңына сәйкес, Жамбыл облысы әкімінің № 347 2014 жылы 26 желтоқсандағы қаулысымен көлемі – 298400 га «Үмбет» жергілікті маңызы бар мемлекеттік табиғи қау­малы Ақыртөбе ормандарды және жануарлар дүниесін қорғау жөніндегі мемлекеттік мекемесінің қарамағына бекітіліп берілді. Бұл қаумал жер­лері Байзақ, Т.Рысқұлов, Меркі аудан­дарының жерлерін қамтып отыр. Ал мекеменің орман қоры жерлері Т.Рыс­құлов ауданының тау және құм алқаптарында орналасқан.
Орманның айналадағы қоршаған ортаға да үлкен әсері бар. Әсем тау­ларымыз бен ормандарымыз арнайы демалу орнына айналған. Орман-тоғай­ларымыз жанға дауа және жеміс-жидек, дәрілік өсімдіктер мен жабайы аң-құстарға бай. Соны­мен қатар бір гектар орманды жер бір гектар ауылшаруашылық алқабына қарағанда 3-10 есе оттегіні көп шыға­рады. Орман ішіндегі ауада қаладағы ауаға қарағанда әр түрлі микробтар 40-70 есе аз. Бір гектар орман алқабы жылына 50-70 тонна шаң-тозаңды тазартады.
Табиғат әлемі өзара бір-бірімен тығыз байланыста болады. Олар бір-бірінсіз тіршілік етіп, өмір сүре алмайды. Осы байлықты ел пайдасына айналдыру – біздің негізгі міндетіміз! Әр нәрсенің жауы бар демекші, осы әсем дүниені түп орнымен құртып жіберетін орманның үлкен жауы – өрттің болып тұратындығы ащы шындық. Өрттің кесірінен ағаш пен бірге қаншама құнды өсімдіктер түбірімен жойылып, жабайы аңдар күйіп қырылатыны белгілі. Өрттің шығу себептеріне келсек, үлкенді-кішілі топтар табиғат аясына шығып демалады. Сонымен қатар жеке шаруа қожалық малшылары мен жұмысшылары от жағып, ас әзірлейді, темекі тұқылын сөндірмей лақтыра салады. Ең өкініштісі, олардан соң күл-қоқыстар қалып, сөнбеген шоқтардан өрт шығып, табиғатқа үлкен зиян келіп жатады.
Өртенген ағаштарды қалпына келтіруге орта есеппен 50-60 жылдай уақыт керек. Бұл – бір адамның ғұмыры. Сондықтан жердің көркі, денсаулыққа шипа – орман алқабын, ондағы аң-құстарды тілсіз жау – өрт зардабынан қорғап, келешек ұрпаққа табиғи қалпында жеткізу орманшылардың ғана емес, осы табиғат аясындағы әрбір перзенттің қасиетті борышы екендігін ұмытпайық. Орман және дала өрттері орын алмасын десеңіз, өрт қауіпсіздігін сақтайық, ағайын! Өрт шыққан немесе байқаған жағдайда тез арада өрт сөндіру бөліміне телефон арқылы – 101, немесе Ақыртөбе КММ-нің – 5-34-97, 8705-737-10-33 нөмірлеріне хабарласыңыздар. Бұл сіздердің табиғатты қорғау жолында өз үлестеріңізді қосқандарыңыз болып табылады.

Leave A Reply

Your email address will not be published.