Бұл жинақтарды әріптестеріміз Аслан Қаженов пен Азамат Әбілқайыр құрастырып шықты. Жобаға «Спорт қоры» қолдау көрсеткен. Шығармаларда Олимпиада жүлдегерлері Геннадий Головкин, Елдос Сметов, Демеу Жадыраев, Нұрбек Оралбай және Назым Қызайбайдың жеңісті жолы баяндалады. Әр кітап балалар мен жасөспірімдерге арналып отыр. «Елде кенжелеп қалған комикс жанры арқылы жас ұрпаққа қазақ чемпиондарының есімі мен жетістіктерін насихаттауды көздедік», – дейді авторлар. Аслан Қаженов, «24KZ» телеарнасының тілшісі, кітап авторы: — Мен Париж Олимпиадасында болдым, барысын көрдім. Сол жақтан ақпарат тараттық. Одан кейін түрлі фильмдер жасадық, түрлі сұхбаттар жаздық. Барынша қолдау таныту спортшыларымызға. Осы бастама да, комикс кітаптар сол кезде ойымызға келді, бірақ жүзеге асыру оңай емес екен. Ол шығармашылық процесс. Әйтеуір араға біраз уақыт салып болса да, жүзеге асып жатыр. Азамат Әбілқайыр, «24KZ» телеарнасының жүргізушісі, кітап авторы: — Біз қашанға дейін шет мемлекеттердегі, мәселен, Гарри Поттерді ұлықтаймыз?! Өзіміздің кейіпкерлеріміз қашан пайда болады дегенде кейіпкерді алыстан іздеудің қажеті жоқ. Ол өзіміздің өскелең ұрпақтың бет бұрып, еңбекқорлықтың, отаншылдықтың үлгісі болған осы чемпиондарымызды ұлықтау мақсатында және осы арқылы біз балалар әдебиетінің кенже қалған комикс жанрына үлес қосқымыз келді.
