Ирактың оңтүстігінде мукормикоз немесе «қара зең» деп аталатын аурудан кем дегенде екі адам қайтыс болды, — деп хабарлайды жергілікті Al Sharqiya порталы.
Елдің денсаулық сақтау департаментінің баспасөз хатшысы Аммар әл-Замили Ирактың Ди-Кар ауданында «қара зең» тарағанға дейін екі адам қаза болғанын айтты.
Олар коронавирус инфекциясынан туындаған асқынулардан кейін көз жұмған. Медицина мамандарының айтуынша, 51 жастағы науқастың көзіне қара саңырауқұлақ шықаннан кейін осындай диагноз қойылған. Елді мекен аумағында мукормикоздың төрт жағдайы анықталды.
Ирак денсаулық сақтау департаментінің директоры Абдул Амир Әл-Халфидің сөзінше, топырақ пен ауыл-аймақтың ластануына байланысты «қара зең» жұқтыру қаупі бар.
Мукормикоз немесе «қара зең» — бұл саңырауқұлақ инфекциясының салдарынан болатын асқыну. Қоршаған ортадағы саңырауқұлақ спораларымен байланыста болатындарда немесе саңырауқұлақтар теріге түрлі жағдайда енгеннен кейін ауру дамуы мүмкін. Ауру қант диабетімен ауыратын адамдар үшін, сондай-ақ аурумен күрескеннен кейін, әсіресе коронавирустан кейін иммунитеті төмендегендер үшін қауіпті.
Еске салайық, бұған дейін Үндістанда коронавирус жұқтырып, одан жазылғандардан «қара зең» анықталған болатын. Үндістанның Раджастан және Телангана штаттары «қара зең» эпидемиясын жариялаған.
Үндістан билігінің мәліметінше, елде «қара зең» жағдайлардың саны тоғыз мыңға жақындаған.
