Жамбыл облыстық өңірлік коммуникациялар қызметінің алаңында Талас ауданының әкімі Нұрбол Жүнісбеков өңірдің әлеуметтік-экономикалық даму көрсеткіштері туралы баяндама жасап, аудандағы еңбек нарығы мен жастар саясатының ағымдағы жағдайын таныстырды.
Бүгінгі таңда Талас ауданында жалпы халық санының 30,8 пайызын құрайтын 14 354 жас тұрады. Олардың 9 490-ы қалада, ал 4 864-і ауылдық округтерде тіркелген. Бұл ретте экономикалық белсенді жастардың саны 8 679 адамды құрап отыр. Жастарды қолдау мен еңбекке тарту мақсатында ауданда жүйелі жұмыстар жүргізілуде. Нақтырақ айтсақ, 2026 жылдың қаңтар-мамыр айларында 337 жас жұмыспен қамтудың белсенді шараларымен қамтылып, жұмысқа орналасты. Оның ішінде 176 жас тұрақты жұмыс орындарына жолдама алса, 47-сі «Жастар тәжірибесі» бағдарламасына, 74-і қоғамдық жұмыстарға және 5 адам әлеуметтік жұмыс орындарына тартылды. Сондай-ақ, жастардың кәсіби біліктілігін арттыру мен кәсіпкерлікке баулу мақсатында «Бизнес-Бастау» жобасы бойынша 16 жас, ал «Skills.enbek» платформасында онлайн форматта 19 жас оқудан өтті.
Мұнымен қоса, ауданда жұмыссыз, NEET және маргиналды санаттағы жастарды анықтау мақсатында арнайы тізімдер тұрақты түрде жаңартылып отырады. Осы бағытта республикалық базадан келген 239 жасқа қатысты адресаттық талдау жұмыстары жүргізілді. Сонымен қатар, жас буынның бос уақытын тиімді пайдалану мәселесі де басты назарда. Жыл басынан бері ауданда әртүрлі бағыттар бойынша жалпы саны 647 іс-шара ұйымдастырылып, оған 8 000-ға жуық жас белсенді түрде қатысты. Аудан әкімі Нұрбол Жүнісбеков өз баяндамасында бұл көрсеткіштер өңірдегі тұрғындар мен жастардың әлеуметтік белсенділігін арттыруға және оларды жұмыспен қамту шараларының жүйелі жүзеге асып жатқанына дәлел екенін атап өтті.
