Меркі ауданында ерекше білімді қажет ететін балаларға арналған «Сәби әлемі» инклюзивті балабақшасы аз уақыт ішінде нәтижелі жұмысымен көпшіліктің ықыласына бөленуде. Ағымдағы жылдың ақпан айында ашылған орталық аудан көлеміндегі алғашқы инклюзивті бағыттағы балабақша болып табылады.
Қазіргі таңда мұнда 25 бала тәрбиеленуде. Орталықта дефектолог, логопед, АФК маманы, медбике, массаж жасаушы секілді білікті мамандар қызмет көрсетіп, әр баламен жеке жұмыстар жүргізуде. Мамандардың айтуынша, балалардың сөйлеу қабілеті дамып, ортаға бейімделуі мен танымдық белсенділігі арта бастаған.
Сабақ барысында балалар дамытушы ойындар ойнап, түрлі жаттығулар орындайды. Сонымен қатар арнайы дене жаттығулары, емдік массаж, бассейн және су процедуралары арқылы олардың денсаулығын нығайтуға ерекше көңіл бөлінуде.
Балабақша басшысы Лаззат Абдрахманова мұндай инклюзивті орталықтың аудан үшін аса маңызды екенін атап өтіп, алдағы уақытта жұмыс аясын кеңейтуді жоспарлап отырғанын жеткізді.
Инклюзивті орталықтың басты мақсаты – ерекше балалардың қоғамға бейімделуіне жағдай жасап, олардың жан-жақты дамуына қолдау көрсету.
