Бүгін облыс әкімі Берік Уәли Үржар ауданының Науалы ауылындағы бұрынғы балалар үйі ғимаратының қазіргі жағдайымен танысты.
Науалы ауылындағы нысан алғашында мектеп ретінде салынған. Кейін балалар үйі болып бейімделген. Мекеме аудан орталығынан 12 шақырым жерде орналасқан. Балалар үйі аумағында 100 және 50 орындық екі ұйықтау корпусы, 15 орындық қосымша корпус, клуб, монша, жазғы лагерь, саяжай, қазандық және өзге де қосалқы нысандар бар.
Балалар үйінің іргетасы 1934 жылы қаланған. Ал негізгі ғимараттары 1965-2004 жылдар аралығында салынған. Жалпы аумағы — 7 гектар. Нысан 180 орынға есептелген.
Мекеме жұмыс істеген жылдары балалар бау-бақша өнімдерімен қамтамасыз етіліп отырған. Аумағында жылыжай жұмыс істеп, көкөніс өсірілген. Әр балаға жеке бақша телімі бекітілген.
2019 жылы бала санының азаюына байланысты Риддер, Науалы және Жаңа Шүлбі балалар үйлері біріктірілген. Кейін облыстар бөлінген соң Науалы мен Жаңа Шүлбідегі балалар үйі Абай облысының қарамағына өткен. Ал 2022 жылы Науалы балалар үйі жабылып, тәрбиеленушілер Жаңа Шүлбіге ауыстырылған.2024 жылы нысан Үржар ауданының коммуналдық меншігіне беріліп, кейін оңалту орталығы мен 50 орындық балабақша ашу мақсатында жеке серіктестікке сенімгерлік басқаруға тапсырылған. Алайда мекеме өз міндеттемелерін орындамағандықтан, биыл келісімшарт бұзылған.
Ғимарат бірнеше жыл бойы қараусыз тұрғандықтан күрделі жөндеуді қажет етеді. Жылу қазандықтары істен шығып, жылу жүйелерінің құбырлары жарылған. Шатырлары да тозған.
Аймақ басшысы жауапты мекемелерге нысанның алдағы тағдырына қатысты нақты ұсыныстар әзірлеуді тапсырды.
«Бұл — ұзақ жылдар бойы балалар тәрбиеленген маңызды әлеуметтік нысан. Аумағы да кең, инфрақұрылымы да бар. Сондықтан мұндай ғимарат бос тұрмауы керек. Енді оның алдағы тағдырын жан-жақты қарап, қандай да бір мекеменің немесе басқарманың теңгеріміне беру мәселесін қарастыру қажет. Ең бастысы — нысанды тиімді пайдаланып, ауыл қажетіне жаратуымыз керек», — деді Берік Уәли.
АБАЙ ОБЛЫСЫ ӘКІМІНІҢ БАСПАСӨЗ ҚЫЗМЕТІ
