Жеңіс күні мерекесіне орай Тараздағы «Жеңіс» саябағында Халық қаһарманы Б.Момышұлының ескерткіші алдындағы «Мәңгілік алауға» гүл шоқтарын қою рәсімі өтті.
Салтанатты шараға облыс әкімінің бірінші орынбасары Нұржан Календеров, шаһар басшысы Бақытжан Орынбеков, соғыс ардагерлері — Шалданбай Шанбаев, Иван Макеев пен зиялы қауым өкілдері және қала тұрғындары арнайы қатысты.
Іс-шара барысында жиналған көпшілік қан майданда қаза тапқан боздақтарды бір минут үнсіздікпен еске алып, рухтарына тағзым етті.
Аталған шара аясында саябақтың амфитеатрында концерттік бағдарлама ұйымдастырылып, патриоттық бағыттағы әсем әндер шырқалды. Сондай-ақ бүгін қаланың өзге де аумақтарында орналасқан Екінші дүниежүзілік соғысқа арналған ескерткіштерге де гүл шоқтары қойылды.
Жалпы, бүгінде Таразда Екінші дүниежүзілік соғысқа қатысқан көзі тірі 3 майдангер қалды. Олар — Шалданбай Шанбаев, Иван Макеев және Геннадий Иванов. Ардагерлердің өмір жолы мен ерлігі өскелең ұрпақ үшін батылдықтың, төзімділік пен елге адал қызмет етудің жарқын үлгісі екені сөзсіз.
Айшықты мерекеге орай шаһар көлемінде патриоттық және танымдық бағыттағы түрлі іс-шаралар көптеп ұйымдастырылуда. Бұл шаралардың басты мақсаты — батырлардың ерлігін ұлықтап, жастардың бойына отансүйгіштік рух сіңіру, тарихи жадыны жаңғырту және бейбіт өмірдің қадірін дәріптеу.