Оқиға 2025 жылдың қазан айында болған. Айыпталушы жәбірленуші С.-тің ІІ-топтағы мүгедектігі бар інісінің жағдайын біліп, оның атына 5 миллион теңге көлемінде «қайтарымсыз несие» рәсімдеп беруді ұсынған. Сенімге кірген ол бұл қызметі үшін алдын ала 300 мың теңге сұрап, жәбірленушіден ақшаны алған.
Алайда уәде етілген несие рәсімделмеген. Тергеу барысында белгілі болғандай, айыпталушы алынған қаражатты жеке басының қажетіне жұмсап жіберген. Осы әрекетінің салдарынан жәбірленуші материалдық шығынға ұшыраған.
Сот отырысында айыпталушы өз кінәсін толық мойындап, жасаған ісіне өкініш білдірді. Сонымен қатар келтірілген шығынды толық өтеп, жәбірленушімен татуласқанын жеткізді. Өз кезегінде жәбірленуші де айыпталушымен келісімге келгенін растап, істі тоқтатуды сұрады.
Істі қараған сот тараптардың татуласуын және залалдың өтелгенін ескеріп, Қылмыстық кодекстің 68-бабы негізінде қылмыстық істі тоқтату туралы қаулы шығарды.
Айта кетейік, сот шешімі әлі заңды күшіне енген жоқ.