Қазақстанда алаяқтықтың жаңа түрі белең алып келеді.
Бұл жолы қаскүнемдер өздерін ірі компаниялардың, мемлекеттік органдардың немесе жоғары оқу орындарының басшылары ретінде таныстырып, азаматтарды алдауға көшкен.
Алаяқтар жалған аккаунттар мен бөтен нөмірлерді пайдаланып, қызметкерлерге телефон арқылы немесе мессенджерлерде хабарласады. Олар «деректер тарап жатыр» немесе «шотыңызға қауіп төнді» деген сылтаумен жағдайды әдейі ушықтырып, адамды асығыс шешім қабылдауға итермелейді. Психологиялық қысым көрсетіп, жедел әрекет етуді талап етеді.
Кейін олар «мамандар» немесе «құқық қорғау органдарының қызметкерлері» хабарласатынын айтып, солардың айтқанын бұлжытпай орындауды сұрайды. Осылайша, азаматтарды ақшасын «қауіпсіз шоттарға» аударуға көндіреді.
Ақша қолға түскен соң, алаяқтар бірден байланысын үзеді. Олар нөмірді ауыстыру, дауысты өзгерту сияқты заманауи технологияларды қолданып, сенімге кіруге тырысады.
ІІМ ескертеді: банк немесе мемлекеттік орган қызметкерлері ешқашан телефон арқылы ақша аударуды талап етпейді.
Aikyn.kz сайты.
