Қазақстандық тұрғын үй нарығында үлескерлердің құқықтарын қорғауға бағытталған жаңа “Орда аймақ” ипотекалық бағдарламасы іске қосылмақ. Бұл туралы “Қазақстандық тұрғын үй компаниясы” хабарлады. Бағдарлама 2025 жылдың 7 сәуірінен бастап қолданысқа енгізіледі.
Жаңа ипотекалық өнім үлескерлерге құрылыс кезеңіндегі тұрғын үйді сатып алу мүмкіндігін ұсынады. Құрылыс процесінің аяқталуына кепілдікті “Қазақстандық тұрғын үй компаниясы” (ҚТК) қамтамасыз етеді. Яғни, егер құрылыс аяқталмай қалса немесе құрылыс компаниясы банкротқа ұшыраса, ҚТК нысанды аяқтауға міндеттеледі. Бұл механизм азаматтардың инвестицияларын қорғауға бағытталған.
Ипотекалық бағдарламаның операторы ретінде “Отбасы банк” белгіленді. Бағдарламаға қатысу үшін өтініш берушінің осы банкте депозиттік шоты болуы және оның атына тіркелген тұрғын үйінің болмауы шарт.
Несиелік шарттар:
•Несиенің жылдық сыйақы мөлшерлемесі – 15,9%;
•Жылдық тиімді сыйақы мөлшерлемесі – 17,26%-дан 22,81%-ға дейін;
•Бастапқы жарна – кемінде 20%;
•Несие сомасы – 1 млн теңгеден 75 млн теңгеге дейін;
•Қарыз мерзімі – 1 жылдан 20 жылға дейін.
Бұл бағдарлама азаматтардың құрылыс кезеңіндегі тұрғын үйлерге қолжетімділігін арттырумен қатар, тұрғын үй нарығындағы қаржылық қауіп-қатерлерді төмендетуді көздейді.
