Президент Қасым-Жомарт Тоқаев Үкіметке Түркияның оңтүстік-шығысында болған жойқын жер сілкінісінің салдарын еңсеруде шұғыл көмек көрсетуді тапсырды.
Бұл туралы Ақорданың баспасөз қызметі мәлім етті.
«Сыртқы істер министрлігі мен Төтенше жағдайлар министрлігі түрік билігімен байланыс орнатты. Жақын арада Түркия Үкіметінің өтініші бойынша зардап шеккен өңірлерге қазақстандық құтқарушылар мен дәрігерлер ұшады», — делінген хабарламада.
Айта кетсек, Мемлекет басшысы Түркия Президенті Режеп Тайип Ердоғанға көңіл айту жеделхатын жолдаған болатын.
«Түркия Республикасында болған аса күшті жер сілкінісі салдарынан көптеген адамның қаза тапқаны туралы суыт хабарды зор күйзеліспен қабылдадым. Осындай қиын сәтте жақындарынан айырылған отбасыларға, сондай-ақ бүкіл түрік ағайындарымыздың ауыр қайғыларына ортақтасып, Қазақстан халқының және жеке өзімнің атымнан көңіл айтамын», – деп жазылған жеделхатта.
Еске салайық, бүгін, яғни 6 ақпанда таңғы сағат 4.00 шамасында Түркияның Сириямен шекаралас Кахраманмараш провинциясында 7,4 баллдық жер сілкінісі болды. Көп ұзамай Газиантеп провинциясында магнитудасы 6,6 болатын тағы бір жер сілкінісі тіркелді. Жерасты дүмпулері жарты сағат бойы әртүрлі аймақта, соның ішінде Анкарада, Адана, Невшехир, Газиантеп, Кайсери, Мерсин, Хатайда сезілді. Al Arabiya телеарнасының хабарлауынша, жер сілкінісін Ирак пен Ливанның кейбір аймақтарының тұрғындары сезінген. Сонымен қатар, Израильде бірқатар жерасты дүмпулері байқалды.
Қазіргі уақытта қаза болғандар саны 1520, жарақат алғандар 8533 адамға жеткен.
Бізден бөлек Түркияға көмектесуге Болгария, Хорватия, Чехия, Франция, Греция, Венгрия, Мальта, Нидерланды, Польша, Румыния, Италия, Испания мен Словакия, Грузия, Ұлыбритания және Өзбекстан мемлекеттерінің де білікті мамандары аттануда.
