Ақтауда жақында дауға іліккен жасанды қызғалдақтар Тараз қаласында орнатылған болып шықты. Пластикалық гүлдерден жасалған инсталляция тараздықтардың да көңілінен шықпаған сияқты. Ұсқынсыз қызғалдақтардың видеосы әлеуметтік желіде таралды.
«Бәріміз білетіндей Ақтауда пластикалық гүлдерді жақсы көретін әкім бар. Ол жалғыз емес екен. Тараздың әкімі де пластикалық қызғалдақтар «егіпті». Әлі құламаған, бірақ кейбірінің бастары жоқ, сұмдық жағдайда. Мінекей біздің Қазақстан», — деді видео авторы.
Тараз әкімдігінде видеоға қатысты пікір білдірді. Олардың айтуынша инсталляцияны жарнамалық мақсатта демеушілер қаржысына орнатқан.
«Гүлдер қыркүйек айында кәсіпкерлердің демеушілік қаржысына жарнамалық мақсатта орнатылды. Ақтаудағы безендіру кешірек пайда болды. Әзірге гүлдерді бұзу дерегі тіркелмеді. Жауапты ұйым мамандары күнделікті тексеріп отырады», — деп түсіндірді қала әкімінің кеңесшісі Зарина Қуатова.
Айта кетейік, бұған дейін Ақтаудағы «Гүлденген дала» декоративті жүйесінің бұзылып жатқаны туралы хабарлаған едік. Инсталляцияның ауданы 200 шаршы метрге тең және жобаны іске асыру үшін 15 404 000 теңге бөлінген.
