Соңғы жылдары мемлекет тарапынан еңбек етемін деген адамға жұмыс, кәсіппен айналысамын деген адамға қаржы жағынан көптеген қолдау түрлері көрсетілуде, Әсіресе, жастарға жан-жақты қолдау көрсетуге мейлінше басымдық беріле бастады. Елдің еті тірі деген балалары аудандық жұмыспен қамту орталығы арқылы қысқа мерзімді немесе кәсіпкерлік бағытта арнайы оқыту курсынан өтіп, бизнеске бет бұрып жатса, кейбірі тұрақты жұмысқа орналасу арқылы еңбек дүбіріне араласуда. Бұл ретте арнайы оқыту курсынан өтіп, өміршең жоба ұсынған жас буыннның мемлекеттен қайтарымсыз қаржы алып, өз кәсібін ашуға мол мүмкіндік алып отырғанын да айта кеткен жөн. Өйткені әр түрлі мемлекеттік бағдарламалар арқылы қайтарымсыз қаржыға ие болып, ісін ілгерілетуге мүмкіндік алған жастар нарық заңы еңбек еткен адамның ғана беделі биіктететінін түсінді. «Бизнестің жол картасы-2020» бағдарламасы бойынша мемлекеттен қайтарымсыз қаржы алған жастар да өңірде аз емес.
Т.Рысқұлов ауданында аудандық жұмыспен қамту орталығына жыл басынан бері жұмыс іздеуші ретінде 1910 азамат қайырылыпты. Осы азаматтардың мәселесін шешуде орталық мамандары қолдан келгенін жасап, оның 1652-сіне жұмыс тауып берген. Нақты айтқанда, 662 адам ақылы қоғамдық жұмысқа тартылыпты. Мұнда қолына жаңадан диплом алған жас мамандар да елеусіз қалып отырған жоқ. Жастарға көрсетілер мемлекеттік қолдау тетіктерін мүмкіндігінше тиіміді пайдалану басты міндеттің бірі. Соның арқасында аталған аудандағы 60 жас маман қолына жастар тәжірибесі бойынша жолдама алып, белгілі бір мекемеде тәжірибеден өткен. Әлеуметтік жұмыс орындары бойынша да 91 адам жұмыспен қамтылса, 839 азамат тұрақты жұмысқа орналасыпты.
– Екі қолға бір күрек іздеп, аудандық жұмыспен қамту орталығына қайырылған азаматтардың жұмысқа орналасуы 86,5 пайызды құрап отыр. Аудан бойынша 1668 жаңа жұмыс орындары ашылса, оның ішінде 846-сы тұрақты жұмыс орны. Шағын несие 98 азаматқа, жаңа бизнес идеяларды іске асыруға мемлекеттік қайтарымсыз грант 200 адамға беріліп отыр. Жалпы ауданда жұмыссыздар саны – 1088, жұмыссыздық деңгейі 3,2 пайызды құрайды.
Нысаналы топқа жататын азаматтардың қайырылғаны 738, оның ішінде жұмысқа жіберілгені 595, жұмысқа орналасуы – 80,6 пайыз. Жыл басынан бері мүмкіндігі шектеулі азаматтардың ішінен 84 азамат жұмыспен қамтудың белсенді шараларына тартылды. Оның ішінде тұрақты жұмысқа 21, уақытша жұмыс орындарына 45 азамат азамат тартылды. «Бастау Бизнес» жобасы бойынша оқуыту курсынан 7 адам өтсе, қысқа мерзімді оқуға 1 азамат жіберілді. 5 адам шағын несие алса, аудан тұрғындарының ішінде 5-еуіне мелекеттік грант берілді, – дейді аудан әкімдігінің жұмыспен қамту және әлеуметтік бағдарламалар бөлімі басшысының міндетін уақытша атқарушы С.Умеева.
