2000 жылдық тарихы бар Тараз қаласы бүгінде адам танымастай өзгерді. Бұрын көне шаһар тарихи жәдігерлерімен танылса, бүгінде қала жаңа кейіпке еніп, жайлы саябақтары мен заманауи туындыларымен талайды таңғалдыруда. Жамбыл облысының әкімі Бердібек Сапарбаевтың бастамасымен Тәуелсіздіктің 30 жылдығына орай жанданған «Таразға тарту» жобасы қала көркіне көрік қосып, ажарын аша түсті. Міне, сондай демалыс орындарының бірі – «Денсаулық» саябағының құрылысы аяқталуға жақын.
Мәдениет және демалыс саябағы медицина қызметкерлерінің және демеушілердің қаржысымен бой көтеруде. Игі іске барлық медицина мамандары үн қосып, біркүндік айлық жалақыларын аударған. Соның арқасында Қарасу алқабынан жайлы, сәнді саябақ салынып жатыр. Саябақ 5 гектар аумақты алатын канал жағалауында орналасқан. Онда мыңнан аса тал, шырша, қайың секілді ағаш отырғызылып, жайқалып тұр.
Бұдан бөлек, саябаққа раушан гүлдер егіліп, субұрқақ орнатылып, сәулетті мүсіндермен безендірілген. Көгалдандыру жұмыстарына денсаулық сақтау саласының ардагерлері мен танымал тұлғалар да атсалысқан.
«Денсаулық» мәдениет және демалыс саябағында спортпен шұғылдануға да барлық жағдай жасалған. Атап айтсақ, теннис және футбол алаңдары, воркаут пен балалар алаңы көпшілікке қызмет көрсетуде. Мұның бәрі азаматтардың эмоционалды және физикалық жағдайын жақсартуда. Күні кеше футбол алаңында медицина қызметкерлері арасында алғашқы аламанның түндігі түріліп, көпшілікке мереке сыйлады.
Медицина қызметкерлерінің бастамасымен демалыс орнына коронавирус кеселімен күресте қаза тапқан сала мамандарын еске алуға арналған «Өзгеге жарық сыйлап, өзім өртеніп барамын» атты стелла да қойылған. Стелла көзсіз ерлікпен көз жұмған 20 медицина саласы маманының есімін ұлықтап тұр.
Қан айналымы жүйесі ауруларының халықтың өмір сүру ұзақтығына, мүгедектікке және өлім-жітімге әсер ететіні ескеріліп, медицина қызметкерлерінің бастамасымен саябақта халыққа «Сенің денсаулығың – сенің қолыңда» деген ұранмен стелла орнатылған.
– Медицина қызметкерлері халыққа көгалдандырылған орында демалуды ұсынып отыр. Таза ауада, табиғат аясында тыныстау, сондай-ақ салауатты өмір салтын сақтап, спортпен айналысу, жаяу жүру, далада жаттығу жасау – тұрғындардың басты ұстанымына айналуы қажет. Бүгінгідей пандемия кезінде, бұл – аса маңызды. Ауырмаудың алдын алуды ұмытпаған жөн. Алдағы уақытта саябақ барлық қала тұрғындары мен қонақтар толассыз ағылатын теңдессіз орын болатынына сенімдімін, – дейді облыстық Денсаулық сақтау басқармасының басшысы Әсет Қалиев.
«Денсаулық» саябағының құрылысы қолға алынғанына тұрғындар дән риза.
– Бұрын арамшөп өсіп, топырағы бетіне шығып жататын аумақ әдемі саябаққа айналғанына қуанып жатырмыз. Кешкісін мұнда отбасыммен келіп тынығып жүреміз. Балалардың ойнап, серуен құруына қолайлы жағдай жасалған. Үйіміздің алдында балалар ойын алаңы болмағандықтан, қазір осы жер сүйікті орнымызға айналды. Кешкісін таза ауамен тыныстап, денсаулығымызды жақсартуға да мүмкіндік тууда, – дейді Қарасу ықшамауданының тұрғыны Асел Исаева.
Бұл ойға қала тұрғыны Нұрхан Нұрланбек те қосылады.
– Анам жасы келген адам. Көп жағдайда үйде болады. Алайда далаға серуендеуге алып шығайық десек, бұрын орын таппай қиналатынбыз. Қазір анамды алып саябаққа барамын. Мұнда адамның өмірге деген құштарлығын оятатын дүние көп. Оны анамның жанарынан байқаймын. Саябаққа келгеннен анамның жүзі жайнап, замандастарымен әңгіме-дүкен құрып, үйге көтеріңкі көңіл күймен оралады. Осындай жұмысқа ұйытқы болып, тамаша саябақ сыйлаған жандарға алғыс айтамын, – дейді қала тұрғыны.
Иә, бұл – бағалауға тұрарлық дүние. Жанға жайлы саябаққа бүгінде ағылған халықтың қарасы қалың. Ең маңыздысы, саябақ қала көркіне көрік қосып, ажарын тағы аша түсті. Ал саябақтың ресми ашылуы медицина қызметкерлерінің кәсіби мерекесіне орай ұйымдастырылмақ.
Жалпы, «Таразға тарту» жобасы аясында 42 нысанның құрылысы қолға алынуда. Олардың қатарында спорт қалашығы, «Үшбұлақ» жағалауы, «Мәдениет» алаңы, «Депутаттар» аллеясы, «Кәсіпкерлер», «Финансистер», «Әлеуметтік еңбек», «Журналистер», «Жер ресурстары» және «Табиғат пайдалану» алаңдары секілді жобалар бар. Аталған құрылыс аудандар мен басқармалардың және жеке демеушілердің күшімен бітуде. Бұл, сөз жоқ, жамбылдықтардың бірлігі мен ынтымағын көрсетіп тұрғаны анық.
Саятхан САТЫЛҒАН,
Жамбыл облысы
