Сауда және интеграция министрі Бақыт Сұлтанов әлеуметтік маңызы бар азық-түлік тауарларының бағасы қымбаттап кеткен аймақтарды тізіп айтты.
«Биылғы бес айдың қорытындысы бойынша әлеуметтік маңызы бар азық-түлік тауарларына бағаның ең жоғары өсімі Түркістан облысында – 9,4 пайыз, Нұр-Сұлтан қалаларында – 8,5 пайыз және Алматыда – 6,0 пайыз тіркелді. Бағаның ең аз өсуі Батыс Қазақстан облысында – 5,7 пайыз, Ақмола облысында – 5,6 пайыз және Қарағанды облысында – 5,2 пайыз байқалады”, – деді Сұлтанов үкімет отырысында.
Министрдің айтуынша, жыл басынан бері әлеуметтік маңызы бар азық-түлік тауарларының бағасы 6,3 пайызға өсті, оның ішінде жалпы өсімнің 84 пайызы алты тауарға тиесілі. Бұл көкөністер, олар үшін маусым аралықтарында бағаның өсуі байқалады, сондай-ақ импортқа тәуелді өнімдер және экспортқа сұранысы жоғары тауарлар. Жылдық есеппен алғанда бағаның өсуі 11,8 пайызды құрады.
Оның айтуынша, азық-түлік бағасының өсуі бүкіл әлемде байқалған. БҰҰ азық-түлік және ауылшаруашылық ұйымының мәліметтері бойынша, биылғы мамырда бағалар өткен жылдың сәйкес кезеңімен салыстырғанда 39,7 пайызға өскен.
