Қазақстандық боксшы Жәнібек Әлімханұлы (9-0, 5 КО) Геннадий Головкин (41-1-1, 36 КО) желтоқсанда кездесуді жоспарлап отырған орта салмақтағы WBA чемпионы Риота Муратамен (16-2, 13 КО) жекпе-жек өткізгісі келетінін айтты. Осыған байланысты ол өзінің промоутеріне өтініш жасады, — деп хабарлайды Vestii.kz.
«Боб Арум, Top Rank, қыркүйекте маған Муратамен жепе-жек ұйымдастырсаңыз. Мен оны жеңіп, Вегаста чемпион боламын. Ал желтоқсанда Жапонияда реванш болады. Кейін бүкіл белдіктерді аламыз! 26 маусымдағы жеңіл жекпе-жек», — деп жазды Әлімханұлы Twitter-де.
Айта кетейік, Әлімханұлы алдағы жекпе-жегін 26 маусымда америкалық Роб Брантпен (26-2, 18 КО) өткізеді. Жекпе-жек он раундқа есептелген және Лас-Вегаста (АҚШ) бокс кеші аясында өтеді, онда украиналық Василий Ломаченко (14-2, 10 КО) мен жапондық Масаеши Накатани (19-1, 13 КО) басты қарсылас болады.
