Жамбыл облысы әкімінің орынбасары Алтай Сембекұлы қоғамдағы өзекті мәселелерді шешудің жаңа кезеңіне қадам басып, жаңадан құрылған «Әділет» партиясының қатарына қосылатынын ресми түрде мәлімдеді.
«Әділет – сөз емес, әрекет. Сондықтан Әділет партиясы қатарына қосылып, нақты іске көшуді таңдадым. Бұл – менің саналы таңдауым», — деп жазды ол instagram желісіндегі ресми парақшасына.
Айта кетейік, «Әділет» партиясы еліміздің саяси аренасында кеше ғана бой көтерген жаңа күш болып табылады. Партияның құрылтайы жақында ғана өткендіктен, қазіргі уақытта ұйымдастыру жұмыстары мен құрылымдық қалыптасу процестері қарқынды жүріп жатыр. Жаңа саяси бірлестіктің басты ұстанымы – азаматтардың құқықтарын қорғау және мемлекеттік басқару ісіндегі ашықтықты қамтамасыз ету.
Қазіргі таңда «Әділет» партиясының Жамбыл облыстық филиалының тізгінін кім ұстайтыны туралы ақпарат әлі де нақтыланбаған. Дегенмен, Алтай Сембекұлы секілді тәжірибелі мемлекеттік қызметшілердің бұл қозғалысқа қолдау білдіруі өңірдегі саяси белсенділіктің арта түсетінін аңғартады. Алдағы уақытта партияның аймақтық құрылымы мен басшылық құрамы бекітіліп, облыс халқына нақты бағдарламасы ұсынылады деп күтілуде.
turaninfo.kz
