«Жамбыл Жабаев бүгін Instagram-да не туралы жазар еді?» тақырыбында ерекше форматтағы байқау өтті.
Жамбыл облысы әкімдігінің мәдениет және тілдерді дамыту басқармасы Жамбыл облыстық көзі көрмейтін және әлсіз көретін азаматтар кітапханасының ұйымдастыруымен «Жамбыл Жабаев бүгін Instagram-да не туралы жазар еді?» тақырыбында рух пен технология тоғысқан ерекше байқау өтті.
Қазақстан Республикасының Президенті Қасым-Жомарт Кемелұлы Тоқаев 2026 жылды «Жасанды интеллект» жылы деп жариялауы – ел дамуының жаңа белеске қадам басқанын айқындайды. Осы бастамамен үндескен шара дәстүр мен заманауи технологияның үйлесімін сәтті көрсетті. Көрермендер уақыт пен кеңістікті байланыстыратын ерекше шығармашылық атмосфераға куә болды.
Шараның басты ерекшелігі – жүргізушілердің бірі жасанды интеллект болуы. «Темірбек» атты ЖИ кейіпкері арқылы цифрлы дәуір мен рухани құндылықтардың байланысы көркем түрде ашылып, көрерменге жаңа форматтағы жүргізу стилі ұсынылды.
Байқауға өңірдегі жетекші оқу орындары мен мәдени мекемелерден 30-ға жуық жұмыс ұсынылды. Қазылар алқасы қатысушылардың жұмыстарын ұлттық-мәдени элементтердің қолданылу деңгейі, эмоциялық және зияткерлік әсері, техникалық сапасы, идеяның жаңашылдығы және форматқа сәйкестігі бойынша бағалады. Нәтижесінде үздік жұмыстар анықталып, жеңімпаздар салтанатты түрде марапатталды.