«Ембімұнайгаз» АҚ-ның Бас директоры Ринат Ізмұханбет 2025 жылдың қорытындысына арналған ұжыммен есептік кездесулерін бастады.
Алғашқы жұмыс сапары «Жылыоймұнайгаз» МГӨ басқармасына қарасты Прорва кен алаңында өтіп, жиынға барлық өндірістік цехтардың өкілдері, учаске басшылары мен мамандар қатысты.
Кеңейтілген жиында өткен жылдың өндірістік-экономикалық көрсеткіштері жан-жақты талқыланды. 2025 жыл қорытындысы бойынша қол жеткізілген нәтижелер сараланып, өндіріс көлемі, еңбек қауіпсіздігі, технологиялық жаңғырту және тиімділік көрсеткіштері бойынша атқарылған жұмыстарға баға берілді.
Сонымен қатар, алдағы кезеңдегі негізгі міндеттер мен өзекті мәселелер нақтыланды. Қатысушылар өндірістегі қауіпсіздік мәдениетін арттыру, жоспарлы көрсеткіштерді орындау, инвестициялық жобаларды іске асыру және өндіріс тиімділігін арттыру бағытында ұсыныстарын ортаға салды.
Есептік кездесу ашық диалог форматында өтіп, ұжым тарапынан қойылған сұрақтарға нақты жауаптар берілді.«Мұндай кездесулер өндірістегі тұрақтылықты қамтамасыз етіп, компанияның стратегиялық мақсаттарына жету жолындағы бірлескен жұмысты күшейтуге мүмкіндік береді»,- деп
Р. Ізмұханбет жиынды қорытты.
Кеңейтілген жиыннан кейін компания басшылығы Прорва кенішіндегі инвестициялық жобалардың орындалу барысымен танысты.
