Мемлекет басшысы Қасым- Жомарт Тоқаев «Адал адам – Адал еңбек – Адал табыс» атты үшінші Ұлттық құрылтайда сөйлеген сөзінде: «Өз кәсібін өте жақсы білетін, оған әбден берілген, еңбекқор адам ғана табысқа жете алады», – деп атап көрсеткен болатын. Бар ғұмырын адал еңбекке арнап келе жатқан кісілер біздің өңірде де аз емес. Солардың бірі – еңбек ардагері, Жарлысу ауылының тұрғыны, 86 жастағы ақсақал Рәт Әбдіраманов. Ақсақал осы жасында «Нива» көлігін өзі жүргізіп, аудан орталығына барып-келеді екен.
Ол кезде «Алғабас» кеңшарының №4 мал фермасы болатын. Ақсақал аталған фермада 35 жыл малшы болған. Әуелі біраз жыл тоқты бағып еңбекке араласса, кейіннен ұзақ жылдар бойы бойдақ қой бағыпты. Оның да өзіндік бейнеті бар. Малды семіртіп, қоңды ұстау керек. Ертелікеш малды өріске шығарып бағу, қораны құрғақ ұстау, қажетті екпелерін салдыру, суару, ақсаған қойларды бөлек ұстап күтімге алу қайдан оңай болсын. Жасынан қажырлы, бірбеткей Рәт бұл жұмыстың қиындығына төзді. Жазғы шілде, қыстың боранында қой шаруашылығының қиындығына азаматтың азаматы, жігіттің жігіті шыдайды. «Мал баққанға бітеді» деген мақал бекер айтылмаған. Рәт жастай шопан ата тұқымына қарады, күтімге алды, бақты. Сондықтан еңбегіне қарай өзінің жеке малы да молая түсті.
