ФУТЗАЛДАН ЕРЕСЕКТЕР АРАСЫНДА
САРЫСУ АУДАНДЫҚ ӘУЕСҚОЙЛАР ЛИГАСЫНЫҢ АШЫЛУ САЛТАНАТЫ ӨТТІ.
Бүгін қаламыздағы Спорт кешенінде футзалдан ересектер арасында Сарысу аудандық әуесқойлар лигасының ашылу салтанаты өтті. Спорттық шараға Сарысу аудандық күзгі лиганың жеңімпазы «Алаш» командасы, аудандық турнирлер мен жарыстардың бірнеше дүркін жеңімпазы «Саудакент» командасы, «Жаңаарық» командасы, аудандық білім және спорт бөлімінің мамандарынан құралған «Ұстаз» командасы, бірлігі жарасқан «Бауырлар» командасы, Сарысу аудандық жазғы лиганың жеңімпаздары Еврохим-1 және Еврохим — 2 командалары мен аудандық күзгі лиганың қола жүлдегерлері көршілес Созақ ауданынан келген «Құмкент» командасы қатысты.
Турнирдің ашылу салтанатына қатысқан аудан әкімінің орынбасары Жұмат Сақыпбеков салауатты өмір салтын ұстанып жүрген спортшыларға сәттілік тіледі. Мұнан кейін спорт жанашыры әрі тұрақты жанкүйер аудан әкімдігінің қаржы бөлімінің басшысы Ерлан Имашев та сөз сөйлеп, турнирдің маңыздылығына тоқталды.Турнирдің 1 — 4 тур ойындарының «Үздік ойыншы» номинациясымен бірқатар әуесқой ойыншылар марапатталды.
Атап айтсақ, «ЕвроХим-2» командасының ойыншысы Өтеген Бақдаулет 1 — турдың, «ЕвроХим — 1» командасының ойыншысы Нұржан Байдалиев 2 — турдың, «Ұстаз» командасының ойыншысы Азизхан Айтжанов 3 — турдың және «Саудакент» командасының ойыншысы Алдаберген Аслан 4 — турдың «Үздік ойыншысы» номинацияларын иеленді.
Жеңімпаздарға арнайы статуэткалар мен дипломдарды аудан әкімінің орынбасары Жұмат Сақыпбеков, Жаңатас қаласының әкімі Илияс Домалақов, футзалдан және кіші футболдан Сарысу аудандық мемлекеттік қызметшілер құрама командасының капитаны Ерлан Имашев және аудан әкімдігінің дене шынықтыру және спорт бөлімінің басшысы Нұржан Айнеков табыстады.Айта кетейік, ойындар әр аптаның сейсенбі, бейсенбі және жексенбі күндері өтеді. Турнир ақпан айына дейін жалғасады. Аталмыш шараға аудан әкімдігі мен қала әкімдігі қолдау көрсетуде.