Мойынқұм ауданының тұрғындары үшін ауызсу мәселесі ұзақ жылдар бойы өзекті болып келген. Кеңес дәуірінен қалған ескірген су жүйелері уақыт өте тозып, кейбір ауылдарда ауызсу тапшылығы туындаған. Жаз мезгілінде бұл мәселе әсіресе күрделене түсіп, тұрғындар құдық суына тәуелді болды. Мемлекет тарапынан бөлінген қаражат аясында соңғы жылдары аудан аумағында жаңа су құбырлары тартылып, инфрақұрылым кезең-кезеңімен жаңартылуда.
Мысалы, «Ақсүйек ауылын сумен жабдықтау және су тарату құрылысы» жобасына 2022-2023 жылдары 1 461,3 миллион теңге бөлініп, құрылыс жұмыстары аяқталғанымен, техникалық мәселелерге байланысты нысан толық іске қосылмаған. Электр желісін тарту барысында «KEGOC» АҚ-мен келісу қажеттілігі туындап, ауа райының қолайсыздығы себепті жұмыстар 2024 жылға қалдырылды. Сол сияқты, Хантау ауылындағы су жүйесін жаңарту жобасына 533,5 миллион теңге бөлініп, құрылыс 2023 жылы аяқталуы тиіс болғанымен, мердігерлер арасындағы сот процестеріне байланысты нысанның толық пайдалануға берілу мерзімі кейінге шегерілді.
Балқаш көлінен мембраналық қондырғылар арқылы ауызсу алатын Мыңарал, Шығанақ, Бурылбайтал, Мирный және Қияқты стансалары үшін 2023 жылы 311,9 миллион теңге бөлініп, қажетті инфрақұрылымдар орнатылды. Алайда, Шығанақ ауылында суды айдау сорғысының қуаттылығы жеткіліксіз болып, қосымша жабдықтар орнату қажеттілігі туындады.
Ақбақай ауылындағы су жүйесін жаңғыртуға республикалық және облыстық бюджеттен 1 533,5 миллион теңге қарастырылып, 75 шақырымдық магистралды су құбырының құрылысы басталды. Нысанның толық аяқталуы 2025 жылдың тамыз айына жоспарланған.
Жалпы, ауызсу мәселесін түбегейлі шешу мақсатында Мойынқұм ауданында кешенді жобалар іске асырылуда. Мамандардың болжамынша, барлық инфрақұрылым жұмыстары кезең-кезеңімен жүзеге асса, алдағы бірнеше жыл ішінде аудан тұрғындары таза ауызсумен толық қамтылатын болады.
