Жамбыл облысында темір жол саласын дамыту және жаңғырту мақсатында кешенді шаралар жүзеге асырылуда. «Энергетикалық және коммуналдық секторларды жаңғырту» ұлттық жобасы аясында өңірде локомотивтерге сервистік қызмет көрсететін зауыт іске қосылмақ. Жобаның жоспарланған өндірістік қуаты жылына 50 бірлік техниканы қамтиды. Бұл аймақтағы темір жол саласының дамуына серпін беріп, техникалық қызмет көрсетудің сапасын арттыруға ықпал етеді.
Жалпы, темір жол көлігін жаңғырту және өндірісті дамыту шеңберінде Қазақстан бойынша 2024 жылы темір жол машина жасау саласына 23,2 млрд теңге инвестиция тартылды. Бұл қаржы жаңа кәсіпорындар ашуға, өндіріс көлемін ұлғайтуға және импортқа тәуелділікті азайтуға бағытталды.
Темір жол инфрақұрылымының дамуы өңірдің экономикалық өсіміне ықпал етіп, жүк және жолаушылар тасымалы сапасының артуына мүмкіндік береді. Жамбыл облысында іске қосылатын жаңа зауыт саладағы технологиялық әлеуетті жақсартуға, жергілікті мамандарды жұмыспен қамтуға және қызмет көрсету сапасын көтеруге ықпал етеді.
Алдағы уақытта темір жол машина жасау саласындағы осындай инвестициялық жобалар аймақтың көлік-логистикалық мүмкіндіктерін кеңейтіп, өңірлік даму стратегиясының маңызды бөлігіне айналмақ.
