Қытай АҚШ-тың баж салығын көтеруіне байланысты Дүниежүзілік сауда ұйымына шағым түсірді. Бұған дейін Дональд Трамп Қытайдан келетін тауарларға баж салығын екі есе арттырған болатын, осылайша тариф 20 пайызға өскен.
РИА Новости-дің Қытайдың Сауда министрлігінің мәлімдемесіне сілтеме жасап хабарлауынша, Бейжің өзінің заңды құқығы мен мүддесін қорғауға ниетті.
«АҚШ 3 наурызда Қытай тауарларына бастапқы 10 пайыздық баж салығына қосымша тағы 10 пайыздық баж салығын енгізетінін хабарлады. Қытай баж салығының көтерілуіне байланысты Дүниежүзілік сауда ұйымының дауларды реттеу механизмі аясында талапарыз берді», — деп хабарлады ведомство өкілдері.
Министрліктегілер АҚШ-тың Қытай тауарларына баж салығын көтеруі ДСҰ ережелерін бұзады және елдер арасындағы сауда-экономикалық ынтымақтастыққа нұқсан келтіреді деп санайды.
Еске сала кетейік, Дональд Трамп президенттік міндетіне кіріскен алғашқы күндері 1 ақпаннан бастап Қытай импортына 10 пайыздық баж салығын енгізуге дайын екенін мәлімдеген болатын. Ол Қытайды Мексика арқылы АҚШ-қа келіп түсетін тыйым салынған зат – фентанилді жеткізеді деп айыптаған.
Ақпанның басында АҚШ Канада, Қытай және Мексикадан келетін тауарларға баж салығын енгізетінін хабарлады.
Ақ үйдің баспасөз хатшысы Кэролайн Ливитттің айтуынша, Канада мен Мексика үшін баж салығы 25 пайыз, ал Қытайға 10 пайыз болып бекітілген. Ол 1 ақпанда күшіне енді.
Бүгін Трамп Қытайдан келетін тауарларға импорттық баж салығын екі есе, яғни 20 пайызға арттырғаны белгілі болды.
