🔹Жамбыл облыстық көзі көрмейтін және әлсіз көретін азаматтар кітапханасы рухани құндылықтар тамырын жас жеткіншек санасына жеткізу, ұлтымыздың руханият дарабоздарының төл туындыларын насихаттау мақсатында «Ақынға 100 сұрақ» айдарымен көптеген іс-шараларды жүзеге асырып келеді.
«Ақынға 100 сұрақ» форматындағы іс-шара бұл жолы Қазақстан Жазушылар одағының мүшесі, ақын Шырын Мамасерікованың шығармашылығына арналды. Жиын барысында ақынның «Елге деген махаббат» атты туындысының Брайль қарпіндегі және аудио форматындағы үнтаспасының тұсауы кесілді.
▫️”Өлеңімнің әр жолы — өмірбаян” деп аталатын әдеби кеш ақынның балалық шағынан үзік сыр шертетін сахналық қойылыммен басталып, сұрақ-жауап айдарына ұласты. Белгілі ақын Ғайни Әлімбекқызы, айтыскер, Мәдениет саласының үздігі Ербол Қамбатыров, «Анаға тағзым» орталығының директоры, қоғам белсендісі Эльмира Мырза-Ғали кештің қадірлі қонақтарының қатарынан табылып, Шырын шығармашылығының шырыны жайында ой өрбітті. Сонымен бірге, ақын Арайлы Жақсылық бастаған «Інжу-маржан» қаламгер қыздар кеңесінің мүшелігіндегі ақын қыздар Шырын Мамасерікованы 80 жас мерейтойымен құттықтап, шапан жапты.
🔸Кеш соңында ақын ұйымдастырушылар мен қонақтарға алғысын айтып, жырдан шашу шашты.
✔️Зиялы қоғам өкілдері, жергілікті қаламгерлер, кітапханашылар мен оқырмандар «Ақынға — 100 сұрақ» форматымен түрлі көкейкесті сауалдарын қою арқылы қаламгерді жан – жақты қырынан тануға мүмкіндік алды.
