Қозықұйрық – жеңсік астың бірі. Бұл өсімдік түрі біздің өңірімізде де көптеп өседі. Содан да оны қазып алушылардың қарамы, әсіресе, көктем айында көбейе түсетіні белгілі. Бүгінде базарларда да қозықұйрық саудасы қызып-ақ тұр.
Қозықұйрық (саңырауқұлақ) — төменгі сатыдағы өсімдіктер ішіндегі ең көп таралғаны. Олардың 100 мыңдай түрі бар. Өзге өсімдіктерден ерекшелігі, олардың пестицидтері, хлорофильдері болмайды. Яғни дайын органикалық заттармен қоректенуге бейім гетеретрофты өсімдіктер.
Олардың жейтін және жеуге жарамсыз түрлері болады.
Бұл да табиғаттың тамаша сыйы. Мемлекеттің қорғауына да алынған. Осыған байланысты оны тек ҚР Орман кодексінде белгіленген талапқа сәйкес қатаң есептегі орман билеті- бланкісі арқылы ғана теруге рұқсат беріледі. Мұндай билетті облыс әкімдігінің табиғи ресурстар және табиғат пайдалануды реттеу басқармасына қарасты мемлекеттік орман шаруашылығы мекемелері тарапынан алуға болады.
Айта кетейік, облыстық мәслихаттың «Облыстың орман қоры учаскелерінде ормандарды пайдаланудың кейбір түрлері үшін төлемақы ставкаларын бекіту туралы» арнайы шешіміне сәйкес қозықұйрықтың бір килограмының бағасы 107 теңге болып белгіленген.
Егер сіз орман қоры телімдерінен қозықұйрық терер болсаңыз, ең алдымен аталмыш аумақ бекітіліп берілген мемлекеттік орман шаруашылығы мекемелері атына өтініш жазып, қозықұйрық өсімдігінің өзіңіз теретін болжамдалған көлеміне сәйкес салық мекемесіне төлемақы төлеуіңіз керек. Міне, осы төленілген сомаңыздың түбіртегін тапсыру арқылы орман билеті бланкісін алуыңызға болады.
Ал мемлекеттік орман қоры телімдерінен қозықұйрық өсімдігін заңсыз терген жағдайда азаматтарға ҚР Әкімшілік құқық бұзушылық Кодексінің 370 бабының 3 тармағына сай 3 айлық есептік көрсеткіш көлемінде әкімшілік айыппұл салынатыны әр кезде де қаперіңізде болсын.
