Спорт – елдің мерейін асырып, абыройын тасытатын сала. Бүгін Сарысу ауданының әкімі Сәкен Мамытов Спорт күні кәсіби мерекесіне орай, үлкен додаларда топ жарып, жүлдеді орындардан көрініп жүрген бір топ жас спортшыларды қабылдады.
— Спортшыларымыз түрлі байрақты бәсекелерден олжалы оралып, еліміздің абыройын үлкен додаларда асқақтатуда. Биылғы жылы 7 спортшы ұл-қыздарымыз Азия ойындарында топ жарып, жүлделі орындардан көрінді. Олардың арасында Рамиля Салимьянова, Жансая Алмағамбетова, Фариза Нүрсейтова сияқты спортшыларымыз әлемдік додоға қатысуға дайындалу үстінде. Кезінде еліміздің абыройын асқақтатқан даңқты боксшы Серік Өмірбеков, самбо күресінің шебері Елена Богунова, футболшы Евгений Яровенко, күні кеше ғана Америка төрінде көк туымызды көкке көтерген Асу Алмабаев сияқты ауданымыздан шыққан спортшылар біздің мақтаныштарымыз. Сіздерге де солардың жолдарын берсін, алдағы уақытта да көк байрағымызды көкке көтеріп, жеңістен жеңіске жете беріңіздер, —деген аудан басшысы үздік спортшыларға сый-сыяпат табыс етті.
Байрақты бәсекелерде олжа салып жүрген спортшыларымызға аудандық мәслихаттың төрағасы Шаттық Мұсабеков өз алғысын білдіріп, жеңісті күндерінің көп болуына тілектестігін білдірді. Елімізге танымал көптеген спортшыларды дайындап, аудан спортының дамуына өз үлесін қосқан, спорт саласының ардагері Жүсіп Кәрібозов жас спортшыларға ақ батасын берді.
Сарысу ауданы әкімдігінің баспасөз қызметі
