Осыдан бірнеше күн бұрын бұқаралық ақпарат құралдарында қыркүйек айының алғашқы күнінде Мемлекет басшысы ел халқына Жолдау жасайтындығы туралы жария етілгелі бері маңызды саяси жаңалықты естуге асықтым.
Бүгін міне, VII шақырылымдағы Парламенттің үшінші сессиясында өткен жаңа Жолдауды әріптестеріммен бірге тамашаладым.
«Әділетті мемлекет. Біртұстас ұлт. Берекелі қоғам» атты 5 бағдарға бағытталған Жолдау ел дамуының әр саласын қамтыған.
Әлеуметтік салаға бағытталған жаңалықтарға тоқталар болсам, ең төменгі жалақының деңгейін 70 мыңға көтеру, әйел азаматтардың зейнеткерлік жасын 61 жасқа төмендету, 18 жасқа дейін «Ұлттық қор – балаларға» атты балалардың жинақтаушы салымдарының болуы, мектептер мен ауруханалардың салынуы т.б. тізбектеліп кете береді.
Сондай-ақ, электр энергиясы мен жылу коммуникациясы, тұрғынүй коммуналдық шаруашылығы, жолдардың сапасын арттыру сынды ел дамуына қарқын беретін салаларды да ұмыт қалдырмады.
Бұл Жолдауда саяси жаңалықтарға толы болды десем артық айтқан болмаспын.
Қасым-Жомарт Кемелұлы Президент сайлау, Парламент пен барлық деңгейдегі мәслихаттардың сайлауының да мерзімін өз сөзімен қалың бұқараға жеткізді.
Демек, қазақстандықтарды алда үлкен саяси науқандар күтіп тұр.
Президент осы Жолдауда «Біздің алдымызда айрықша міндет тұр.
Бұл – еліміздің егемендігін және жеріміздің тұтастығын сақтап қалу. Елдігімізді қорғаудың ең басты жолы – берекелі бірлік. Бұдан басқа жол жоқ» деп ұлттың ұйысуы үшін бірлік-берекенің қажет екендігін қайталауы тектен-тек емес.
Бастысы, ынтымақ болса, еліміз өркендеп, дами бермек.
Лаура Нұрмаханова,
Сарысу аудандық маслихатының депутаты,
Б. Қашқынбаев атындағы орта мектебінің директоры
