Украинада орналасқан Энергодар қаласындағы Еуропадағы ең үлкен Запорожье атом электр стансасына шабуыл кезінде ресейлік әскерилер бірінші энергоблокқа снаряд атты.
Украинаның сыртқы істер министрі Дмитрий Кулеба Ресей әскерлері қазір Запорожье атом электр стансасын атқылап жатқанын айтты. Бұл Еуропадағы ең үлкен атом электр стансасы. Өрт әлдеқашан тұтанып үлгерді. Оның айтуынша, егер ол жарылып кетсе, оның салдары Чернобыль атом электр стансасы апатынан он есе жойқын болады.
Бұл туралы Киев уақытымен 4 наурыз күні сағат 2.14-те Telegram желісінде Запорожье АЭС баспасөз қызметінің өкілі Андрей Туз хабарлады.
«Запорожье атом электр стансасындағы өрт жалғасуда. Өрт сөндірушілердің өрт орнына жетіп, зардаптарын жоюы мүмкін емес. Олар оқ атуда! Бірінші энергоблокта соққы жасады» деді ол видеохабарламада.
Энергоатом қазіргі уақытта стансадан жел Украинаның оңтүстік-шығыс бөлігіне және Ресейдің ірі қалалары – Дондағы Ростов пен Краснодар бағытында соғып жатқанын хабарлады.
«Сегодня» хабарлауынша, Ресей әскері снаряд атқан бірінші энергоблок жоспарлы жөндеуден өткен. Бірақ ол жақтан ядролық отынды шағырып үлгермеген.
«Рада» телеарнасының эфирінде Tуз 3 наурыз күні кешке 100-ге жуық ресейлік техниканың атом электр стансасының өнеркәсіптік алаңына бет алып, Запорожьеге кіргенін хабарлады.
«Дәл қазір әскери техника тікелей атом электр стансасын атқылап жатыр. Снарядтар тиіп жатыр. Дұшпандық техника қозғалып, тікелей АЭС-ке оқ атуда. Өндірісте түтін көрінді» деді Туз.
Ол АЭС-те пайдаланылған ядролық отынды сақтайтын қойма бар екенін айтты.
«Оған жаудың оқ жаудырмағаны жақсы. Бұл өте қауіпті» деді Туз.
26 ақпанда-ақ Украина ішкі істер министрлігі басшысының кеңесшісі Вадим Денисенко ресейлік әскерилер қалаға жақындап, Энергодар мен Запорожье атом электр стансасына бағытталған «Град» зымырандарын орналастырғанын хабарлады.
«Энергоатом» NNEGC басшысы Петр Котин 2 наурызда қалаға кіре берістегі бақылау-өткізу бекетіне 22 мыңға жуық адам келіп, ресейлік әскерилердің жолын жауып тастағанын айтты. 3 наурызда орыс басқыншылары Энергодарға тағы да жақындап, оны оқ жаудырып, қалаға ене алды. Сағат 22:30 шамасында Энергодар әкімі жау техникаларының колоннасы АЭС жаққа қарай жылжып келе жатқанын, қалада қатты оқ дыбыстары естілгенін хабарлады. 4 наурыз күні сағат 1:40 шамасында қала билігі басқыншылар стансаны атқылап жатқанын және сол жерде өрт шыққанын хабарлады.
Энергоатом әлемдік қоғамдастыққа үндеу тастап, Запорожье атом электр стансасының энергоблоктарын ауыр қарумен атқылау «Еуропадағы ең ірі ядролық нысанның ядролық және радиациялық қауіпсіздігін өрескел бұзу болып табылады. Бұл бүкіл әлем үшін ауыр және қайғылы зардаптарға әкелуі мүмкін» деп ескертті.
Запорожье АЭС-і Запорожье облысының Энергодар қаласында, Каховка су қоймасының жағасында орналасқан. Стансаның құрылысы 1981 жылы басталған. 1984-1987 жылдары төрт энергоблок, 1989 жылы бесінші, 1995 жылы алтыншы энергоблок іске қосылды. Жыл сайын станса Украинадағы жалпы жылдық электр қуатының бестен бір бөлігін өндіреді.
