Қала күніне орай көптеген нысандары ел игілігіне берілді. Солардың бірі – «Арай-2» шағын ауданындағы Домалақ ана көшесінде орналасқан №5 үйдің маңынан есігін айқара ашқан әлеуметтік дүкен. Нысанның ашылуына облыс әкімі Бердібек Сапарбаев арнайы қатысты.
– Мұндай нысандардың негізгі мақсаты – халық көп тұтынатын тауарлардың бағасын тұрақтандырып, жергілікті ауыл шаруашылық өнімдеріне қолдау көрсету. Бүгінде Тараз қаласында инфляция деңгейін тұрақтандыру шеңберінде әлеуметтік маңызы бар 19 азық-түлік тауары бағаларының негізсіз өсуіне жол бермеу мақсатында 4 жұмысшы топ құрылып, қызмет атқаруда. Олардың құрамына облыстық ауылшаруашылық басқармасының қызметкерлері, қоғамдық кеңес мүшелері, қалалық мәслихат депутаттары енді. Соның арқасында осы жылдың 8 айының қорытындысы бойынша әлеуметтік маңызы бар азық-түлік тауарларына бекітілген шекті мәні қаладағы ірі сауда дүкендері басшыларының назарына жеткізіліп, бағаны өсірмеу бойынша 8 меморандумға қол қойылды. Бұдан бөлек, қаланың 7 ірі сауда дүкенінде әлеуметтік бұрыштар ашылып, тұрақтандыру қорынан азық-түлік тауарлары жеткізіліп, нарық бағасынан төмен сатылуда. Жалпы қазіргі таңда шаһар аумағында 6 әлеуметтік павильон жұмыс істесе, тағы 100 шаршы метрді құрайтын 9 және 200 шаршы метрді құрайтын 1 павильон қолданысқа берілді. Сондай-ақ, халық тығыз орналасқан «Қарасу» шағын ауданы №5 үйдің алдында, «Талас» шағын ауданы №3 үйдің алдында, Рысбек батыр және Рахимов көшелерінің қиылысындағы жатақхананың жанында, Байзақ батыр көшесі №170 үйдің алдында, Асқаров көшесі №278 үйдің қасбеті, Төле би көшесі №7 және №3 үйлердің арасында, Тобыл көшесі бойындағы «Родничок» алқабында 7 жер телімі анықталып, «Тараз әлеуметтік кәсіпкерлік корпорациясы» АҚ-на әлеуметтік дүңгіршектер салу туралы ұсыныс жіберілген. Олардың да игілігін тұрғындардың көретін күні жақын. Жалпы облыс бойынша 32 әлеуметтік дүкен бар. Келешекте тағы 11 нысанды ашу жоспарлануда, – деген аймақ басшысы дүкен сатушыларымен, сатып алушылармен тілдесіп, жұмыстарына табыс тіледі.
Құны 46 млн.теңгені құрайтын нысанның 430 шаршы метрді алып жатыр. Сондай-ақ мұнда 19 түрлі қолжетімді бағада саудаланбақ. Тауарларды жеткізу бойынша 4 кәсіпорынмен, 10 шаруақожалығымен келісім жасалған. Мұнда келген әрбір тұтынушы бірінші сортты ұнның келісін 125 теңгеден, картопты 115, өсімдік майының 1 литрін 560 теңгеден ала алады.
Осындай нысанның бой көтергеніне тұрғындар да дән риза.
– Бұрын мұндай дүкен көршілес орналасқан «Бәйтерек» ықшам ауданында болатын. Енді осындай сауда орнының өзімізде де ашылғанына қуаныштымын, – қала тұрғыны Гүлдара Насылханқызы.
