Ағымдағы жылдың маусым айында Орталық коммуникациялар қызметінде өткен брифингте Жамбыл облысының әкімі Бердібек Сапарбаев: «Тұрғындарды таза ауызсу және көгілдір отынмен қамтамасыз ету жұмыстары да – басты назарда. Атап айтсақ, жыл соңына дейін 44 мың тұрғын тұратын 12 ауылдық елді мекенге су құбыры жүргізіліп, қамтылу деңгейі 88,7 пайызға жетпек. Сол секілді 20 елді мекенге газ тартылып, газдандырылу үлесі 83,8 пайызды құрамақ. Осылайша 257 елді мекендегі 953 мың жамбылдықтың көгілдір отын қолы жететін болады»,–деп атқарылған жұмыстарды баяндап, алдағы жоспарларды баяндаған болатын.
Халықтың өмір сүруіне қолайлы жағдай жасау мақсатында атқарылып жатқан жүйелі жұмыстың жемісін шалғайдағы шулықтар да көруде. Соңғы бірнеше жылда ауданда халықты ауызсумен қамту, көгілдір отын тарту жұмыстары қарқынды жүргізілді. Жалпы аудан бойынша Шу қаласы және 24 ауылдық елді мекен орталықтандырылған ауызсумен қамтылған. Өткен жылы Шу қаласындағы Қосқұдық мөлтек ауданына және Оразалы батыр ауылының тұрғындарын ауыз сумен қамтуға қаржы бөлінген болатын. Нәтижесінде Оразалы батыр ауылында жұмыстар аяқталды. Ал Қосқұдық мөлтек ауданындағы жұмыстар жыл соңына дейін аяқталады деп жоспарлануда.
Сонымен қатар Ақтөбе, Төле би ауылына кіреберіс сол жақ беткейі, Шу қаласы Қант зауыты мөлтек ауданы, Енбекші ауылдарын ауызсумен қамтуға жобалық-сметалық құжаттар әзірленіп, мемлекеттік сараптама қорытындысы алынуда. Сондай-ақ Көкқайнар (262,5 миллион теңге), Сауытбек (186,3 миллион теңге), Көктөбе (760,0 миллион теңге) ауылдарына ауызсу құбырын жүргізуге қаржы бөлуге бюджеттік өтінім берілген.
Қазіргі уақытта аудандағы он екі елді мекен (Шу қаласы, Жаңажол, Көкқайнар, Белбасар, Еңбекші, Төле би, Бірлік, Қонаев, Көктөбе, Бірлікүстем, Алға, Сауытбек) толық газдандырылған. Газдандыру жоспарына енгізілген 18 елді мекеннің он біріне (Абай, Мойынқұм, Еңбек, Жиенбет, Ақтөбе, Тасөткел, Аспара, Тасөткел су қоймасы, Жайсан, Ақсу, Оразалы батыр) магистралды газ құбыры салынып, ШРП-лар орнатылады. 2022 жылы қалған 7 елді мекенге (Бәйдібек, Бөлтірік, Ақтасты, Балуан Шолақ, Далақайнар, Шоқпар, Шоқпар бекеті) магистралды газ құбыры салынатын болады.
Міне мұның барлығы сала мамандарының жанкешті, табанды еңбегінің жемісі. Қуантатыны, тек Шу ауданында ғана емес, обылстың барлық ауданында осы бағыттағы жұмыстар кезең-кезеңімен қарқынды жүргізілуде.
