Өткен жылға қарағанда қауіптің беті қайтқанымен вирустың жаңа штамдары пайда болып, сырқатқа шалдыққандардың саны қайта артып барады. Мәселен, тек өткен тәуліктің өзінде облысымызда 200 адамның қауіпті вирусты жұқтырғаны анықталған. Осыған байланысты науқастарды емдеуге қажетті дәрі-дәрмектің қаншалықты жеткілікті екеніне көз жеткізу үшін облыс әкімінің орынбасары Дәулет Кәрібек Тараз қаласындағы дәріханаларды аралап, «СК-Фармация» компаниясының Тараздағы қоймасына, облыстық және қалалық ауруханаларға арнайы барды.
Облыстық көпбейінді ауруханада дәл бүгінгі күні коронавирусқа шалдыққан 135 науқас емделіп жатыр. Мұндағы қажетті дәрі қоры 1 айға жеткілікті. Одан арғы мерзімге қажетті дәрі-дәрмекті жеткізу үшін«СК-Фармация» компаниясына тапсырыс берілген. Аурухана басшылығы дәрі-дәрмектің жеткізілуінде ешқандай қиындықтар жоқ екенін айтты.
Ал Тараз қалалық көпбейінді ауруханада аталмыш дертті жұқтырған 70 жүкті келіншек ем алуда. Мұнда да медициналық бұйымдар мен дәрілік препараттарға байланысты мәселе жоқ .
Қаладағы «Әмір және Д» дәріханасы мен «СК-Фармация» компаниясының Тараз қаласындағы қоймасындағы жағдай да қалыпты. Мәселен өткен жылғыдай дәріхана алдында ұзын сонар кезек жоқ. Баға да тұрақты.
Ал облыс әкімінің орынбасары Дәулет Кәрібек сақтық шараларын ұстанып, вакцина салдырмаса, жағдай жақсармайтынын баса айтты. Сонымен қатар азаматтарға үй жағдайында ем алмауға кеңес берді. Өйткені, өздігінен ем қабылдап, жағдайды ушықтырып, ауыр халде ауруханаға түскен науқастарда көп.
Қазір Жамбыл облысында той-томалақта тоқтамауда. Жасырын той жасау барысында жасырын вирус біраз адамды құрығына алуда. Алайда, тойшыл халықты тек арнайы мобилдік топтың арнайы тексерісі ғана тоқтатуда. Айта кетсек, ауруханаларда індет жұқтырған 72 жүкті келіншек пен 18 жасқа дейінгі 52 бала ем қабылдауда. Көбі қауіпті дертті той-жиында жұқтырған. Бұл азаматтардың өз ата-әжелерінің, балаларының, отбасының алдындағы жауапкершілігіне немқұрайды қарағанын көрсетеді, – деді Д.Жамаубайұлы.
Облыс әкімінің орынбасары баса назар аударға тағы бір мәселе екпе салу. Індетті жеңудің жалғыз жолы – екпе қабылдау екеніне қазір көптің көзі жетті. Вакцинаның құжатын саудаға салғандар заңмен өте қатал түрде жазалануда. Сатушымен қатар сатып алушы да жауапкершілікке тартылатын болады.
