«Nur Otan» партиясы аудандық филиалында Саяси кеңестің Бюро отырысы өткізіліп, оның күн тәртібінде екі мәселе қаралды. Оған «Nur Otan» партиясы аудандық филиалының төрағасы, аудан әкімі Нұржан Нұржігітов төрағалық жасады.
Бюро отырысының күн тәртібі бекітілген соң Нұржан Молдиярұлы ауданның алдағы бес жылға арналған әлеуметтік-экономикалық және қоғамдық-саяси бағыттарын айқындаған «Nur Otan» партиясы аудандық филиалының 2025 жылға дейінгі Сайлауалды бағдарламасын жүзеге асырудың «Жол картасы» жобасы әзірленгенін атап өтті. Сондай-ақ, аталмыш жоба Бюро отырысының алдында аудандық мәслихаттағы депутаттық фракция отырысында талқыланғанын жеткізді.
Алдымен күн тәртібіне шығарылған «Nur Otan» партиясы Байзақ аудандық филиалының 2025 жылға дейінгі Сайлауалды бағдарламасын жүзеге асырудың «Жол картасын» бекіту туралы аудан әкімдігі экономика және бюджетті жоспарлау бөлімінің басшысы Дулат Жақыпбеков баяндама жасады.
Алдағы бес жылға арналған бұл бағдарлама «Nur Otan» партиясының Сайлауалды бағдарламасы негізінде жасалған стратегиялық маңызды құжат екеніне назар аударылды. Бюро отырысына «Жол картасының» іске асырылу барысы туралы тиісті мекеме басшыларының есептерін тыңдау енгізіліп, фракция мүшелері мен партия аудандық филиалы жанындағы комиссиялардың жұмыс белсенділігін арттыру қажеттігі айтылды.
Күн тәртібіндегі К.Әзірбаев атындағы балалар саз мектебінің директоры, аудандық мәслихаттың депутаты Панабек Ахметовтың партиялық жауапкершілігін қарау мәселесі бойынша Партиялық бақылау комиссиясының төрағасы Мырзағали Мадимаров сөз алды.
Бюро отырысының күн тәртібіне шығарылған екі мәселе бойынша Саяси кеңестің Бюро мүшелері бірауыздан тиісті қаулылар қабылдады.
Жұлдыз МАМЫҚОВА,
«Nur Otan» Байзақ партиясы аудандық филиалының консультанты.
