YouTube бұдан былай негізгі жарнама орнына — веб-сайт пен қосымшаның жоғарғы жағында көрсетілетін баннерде алкоголь, құмар ойындар, сайлау және саясат немесе рецептпен берілетін дәрі-дәрмек жарнамасын қабылдамайды.
Бұл жарнамалар 14 маусымнан бастап жоғарғы баннерде көрсетілмейді.
Google өкілі TheVerge басылымының журналистеріне жаңа шектеулер «қолданушылардың пікірін жақсартуға» арналғанын айтты.
Жоғарғы баннердегі жарнама блогы — YouTube-ті аша салғанда көзге түсетін орын. Дәрі-дәрмектерді, алкогольді немесе құмар ойындарды жарнамалаудан бас тарту YouTube-ті әр түрлі жастағы қолданушылар көре алатындай етіп жасайды.
Ал саясатына келер болсақ, жаңа шектеу YouTube-ке келіспеушіліктер мен жанжалдардан аулақ болуға көмектеседі, мысалы, АҚШ-тың бұрынғы президенті Дональд Трамп 2020 жылғы сайлау кезінде үш күнге жоғарғы баннерді сатып алған кезде дау шыққан.
